ވ. އަލިމަތާ ކައިރީ ކަނޑުއަޑީގެ ހޮހޮޅައަކަށް ފީނަން ދިޔަ އިޓަލީ ޑައިވަރުންތަކުގެ ހަށިގަނޑުތައް ހޯދާ އެ ހަށިގަނޑުތައް ނެގުމަށް ކުރިއަށްގެންދިޔަ އޮޕަރޭޝަންގައި ތަހުގީގަށް ބޭނުންވާ މުހިންމު ސާމާނުތަކެއް ނަގާފައިވާ ކަމަށް ޑައިވާސް އެލާޓް ނެޓްވޯކް (ޑޭން) ޔޫރަޕުން ބުނެފި އެވެ.
އެ ގުރޫޕުން ވަނީ އެންމެ ފަހުގެ ޑައިވިންއަށް ފަހު އޮޕަރޭޝަން ނިންމާލާފައިވާކަން ހާމަކޮށްފަ އެވެ. ފަހުގެ ޑައިވިން 50 މިނެޓަށް ކުރިއަށް ގެންދިޔަ އެވެ. މި ޑައިވިންގައި ތަހުގީގަށް ބޭނުންވާ ބައެއް ސާމާނު ނަގާފައިވާ ކަމަށް ވެސް ބުންޏެވެ. އަދި ތަހުގީގީ އިދާރާތަކާއި އެތަކެތި ހަވާލުކޮށްފައިވާ ކަމަށް ވަނީ ބުނެފަ އެވެ.
އޭގެ ފަހުން ޑޭން އިން ވަނީ ހޮހޮޅައިގެ ފޮޓޯތަކެއް އާންމުކޮށްފަ އެވެ. އެ ފޮޓޯތަކުގައި ފެންނަނީ ކޭވްގެ ބޭރާއި އެތެރޭގެ ބައެއް މަންޒަރުތަކެވެ. އެ ގުރޫޕުން ބުނީ އެއީ ފުން އަދި އަނދިރި ހޮހޮޅައެއް ކަމަށެވެ.
ރެސްކިއު ޓީމުން އާންމުކޮށްފައިވާ ފޮޓޯތައް --
ދެ ބުރަކަށް ބަހާލައިގެން ކުރިއަށް ގެންދިޔަ ތިން ގަޑިއިރުގެ އޮޕަރޭޝަނުގައި، ހޮހަޅައިގެ އެންމެ އެތެރޭގައި ތިބި މީހުންގެ ހަށިގަނޑުތައް ވަނީ ނަގާފަ އެވެ.
ހޮހަޅައިގެ ތެރޭގައި ހުރި ހަނި ގޯޅިތަކާއި، ވެލީގެ ސަބަބުން ފެންނަ މިންވަރު ދަށްވުމުގެ ސަބަބުން ގޮންޖެހުންތައް ކުރިމަތިވީނަމަވެސް ޓީމުން ވަރަށް ކާމިޔާބު މަސައްކަތްތަކެއް ކޮށް ހުރިހާ ހަށިގަނޑުތައް ވަނީ ނަގާފަ އެވެ. އަދި އެ ހަށިގަނޑުތައް އިޓަލީއަށް ގެންދިއުމުގެ މަސައްކަތް ދަނީ ކުރަމުންނެވެ.
ރެސްކިއު ޓީމުން އާންމުކޮށްފައިވާ ފޮޓޯތައް --
ފަހުގެ ޑައިވްގައި ހޮހަޅައިގެ މެޕެއް ތައްޔާރުކުރުމަށް ކުރަން ޖެހޭ މަސައްކަތަށްވެސް މައުލޫމާތާއި ފޮޓޯ/ވީޑިއޯ ނަގާފައިވެ އެވެ. އެ ގުރޫޕުން ވަނީ އެ މެޕް ދިވެހި ސަރުކާރުގެ ކަމާބެހޭ އިދާރާތަކާއި ހަވާލުކުރަން ނިންމާފަ އެވެ.
މި ހިތާމަވެރި ހާދިސާގައި ގެއްލުނު މީހުން ހޯދުމުގެ މަސައްކަތް ކުރަމުން ދަނިކޮށް، މިމަހުގެ 16 ވަނަ ދުވަހު އެމްއެންޑީއެފްގެ ސާޖަންޓް ފަސްޓް ކްލާސް މުޙައްމަދު މަހުދީ ވަނީ ނިޔާވެފަ އެވެ.
Advertisement
This content is created and paid for by advertisers and does not involve Voice Journalists
