މިފަހަރުެގ ވަރލްޑްކަޕްގައި ވާދަކުރާ އާޖެންޓީނާގެ ޓީމް ދަތުރުކުރުމަށް ހާއްސަ މަތުިންދާބޯޓެއް ތައްޔާރުކޮށްފިއެވެ.

މި މަތިންދާބޯޓު ތައްޔާރުކޮށްފައިވަނީ އާޖެންޓީނާގެ ޤައުމީ އެއާލައިން އެއިރޯލައިންސްއެވެ. މި ބޯޓު ތައްޔާރުކޮށްފައިވަނީ އެޤައުމުގެ ފުޓްބޯޅަ ލެޖެންޑް ޑިއޭގޯ މަރަޑޯނާ އަދި އެންމެފަހުން ވަރލްޑްކަޕް އާޖެންޓީނާ ކާމިޔާބުކުރި ޓީމްގެ ކެޕްޓަން ލިއޮނެލް މެސީއަށް ނިސްބަތްވާ 10 ނަމްބަރު ތީމަކަށް ނަގައިގެންނެވެ. ޑިއޭގޯ މަރަޑޯނާއަކީ އާޖެންޓީނާގެ އިތުރުން ދުނިޔޭގައިވެސް މިހާތަނަށް އުފެދުނު އެންމެ ހުނަރުވެރި އެއް ކުޅުންތެރިޔާއެވެ. އަދި އާޖެންޓީނާ ރައްޔިތުން ސިފަކުރާގޮތުގައި ލިއޮނެލް މެސީއަކީވެސް ހަމަ އެ ދަރަޖައިގެ ކުޅުންތެރިއެކެވެ. މަރަޑޯނާ އަދި މެސީގެ ކެޕްޓަންކަމުގެ ދަށުން އާޖެންޓީނާއިން ވަނީ ވަރލްޑްކަޕް ތަށި ހޯދާފައެވެ.

އެގޮތުން ބޯޓުގެ ފަހަތުގައި އާޖެންޓީނާގެ ޤައުމީ ޓީމްގެ ޖާޒީގެ ހާއްސަ ޑިޒައިންކަމަށްވާ ނޫކުލައިގެ ރޮނގާއެކު ވަނީ 10 ނަމްބަރު ޖަހާފައެވެ.

މީގެ އިތުރުން ބޯޓް އިންޖީނުގެ ބޭރު ވަނީ ޤައުމީޓީމްގެ ކެޕްޓަން ބޭންޑް ސިފަވާގޮތަށް ޑިޒައިންކޮށްފައެވެ. އާޖެންޓީނާގެ ޤައުމީ އެއާލައިނުން ޓީމު ދަތުރުކުރުމަށް ބޭނުންކުރުމަށް ނިންމާފައިވާ މި ބޯޓަކީ އެއާބަސް އޭ 300-200 މަރުކާގެ ބޯޓެކެވެ. 

މިފަހަރުގެ ވަރލްޑްކަޕްގައި އާޖެންޓީނާ ހިމެނެނީ ގްރޫޕް ޖޭގައެވެ. އެޓީމް މިފަހަރު ލައްވާލީ ނިސްބަތުން ފަސޭހަ ޓީމްތަކެއް ހިމެނޭ ގްރޫޕަކަށެވެ. މި ގްރޫޕްގައި ހިމެނެނީ އާޖެންޓީނާގެ އިތުރުން އަލްޖީރިއާ، އޮސްޓްރިއާ އަދި ޖޯޑަން އެވެ.

އާޖެންޓީނާއިން މިފަހަރުގެ ވަރލްޑްކަޕަށް ހާއްސަ މަތިންދާބޯޓެއް ތައްޔާރުކޮށްފައިވަނީ، މިފަހަރުގެ ވަރލްޑްކަޕަކީ ލިއޮނެލް މެސީގެ އެންމެ ފަހުގެ ވަރލްޑްކަޕް ކަމަށްވާތީއެވެ.