ދ. ކުޑަހުވަދޫގައި މިހާރު ކުރިއަށްދާ ކުޑަހުވަދޫ ބޮޑު ޢީދު ފުޓްސަލް ޗެލެންޖް 1447 ގެ ގްރޫޕް ދޭއްގައި އައްކަން ސްޕޯޓްސް ބަލިކޮށް ގުޅުން ކަންމަތި ސްޕޯޓްސް އިން މުހިންމު މޮޅެއް ހޯދައިފިއެވެ.

ކުޅުނު ފުރަތަމަ މެޗުން ބަލިވުމުން މިރޭ އައްކަން އާ ދެކޮޅަށް ކަންމަތިން ނިކުތީ، ސީދާ ތިން ޕޮއިންޓް ހޯދައި ކުރިއަށްއޮތް ބުރަށް ދިއުމުގެ އުއްމީދުގައެވެ. އައްކަން އާ ދެކޮޅަށް ކުޅުނު މިމެޗް ކަންމަތި ކާމިޔާބުކުރީ 2-5 ގެނަތީޖާއިންނެވެ.

މެޗްގައި ކަންމައްޗަށް ގޯލް ހުޅުވާލަދިނީ، މުހައްމަދު އިހުސާނެވެ. ކަންމަތިން ގޯލެއް ޖަހައި ލީޑް ނަގާފައިވަނިކޮށް އައްކަންގެ އިސްމާއީލް އައްމަރު އަހުމަދު ވަނީ 17 ވަނަ މިނެޓް ތެރޭގައި ލަނޑެއް ޖަހައި މެޗް އެއްވަރުކޮށްފައެވެ. އައްކަންއިން މެޗް އެއްވަރުކޮށްފައިވަނިކޮށް، ކަންމައްޗަށް ދެވަނަ ފަހަރަށް ލީށް ނަގައިދިނީ، 20 ވަނަ މިނެޓް ތެރޭގައި ސަލްމާން ލުގްމާނެވެ. މެޗްގައި ދެން ކަންމައްޗަށް ގޯލްތައް ޖަހައިދިނީ، މުހައްމަދު އިހްސާން، ލުޖައިން ހުސައިން އަދި ސާހިލް މުހައްމަދެވެ.

އައްކަންގެ ދެވަނަ ލަނޑު ޖަހައިދިނީ، ޖުމާން އަބްދުލް ޖަލީލެވެ. މި މެޗުގެ މޮޅު ކުޅުންތެރިޔާގެ މަޤާމު ހޯދީ އަޙުމަދު ޝިނާޒެވެ.

މެޗްގެ މޮޅު ކުޅުންތެރިޔާގެ މަގާމްގެ އެވޯޑް ހަވާލުކުރުން

މި ނަތީޖާއާ އެކު ގްރޫޕް 2 ގެ ތާވަލަށް ބޮޑު ބަދަލެއް ވަނީ އައިސްފައެވެ. ގުޅުން ކަންމަތި އެސްސީ އަށް ތިން ޕޮއިންޓް ލިބި، ޑްރީމް އެފްސީ އާއި ރުޙުދާ އެސްސީ އާ އެއް ހަމައަކަށް ވަނީ ޖެހިލައިފައެވެ.

ގްރޫޕްގެ އެންމެ ފުލުގައި އެއްވެސް ޕޮއިންޓެއް ނުލިބި އައްކަން އޮތްއިރު، ގްރޫޕުން ދެވަނަ ބުރަށް ދިއުމަށް ކުރިއަށް ހުރި މެޗުތަކުން މޮޅުވުން އެޓީމަށް މަޖުބޫރެވެ. ނަމަވެސް އެޓީމަށް ފުރުސަތެއް ދެން އޮތީ ކުރިއަށް ހުރި މެޗްތަކުގެ ނަތީޖާތައްވެސް ނިކުންނަ ގޮތަކުންނެވެ.