ފުވައްމުލައްސިޓީގެ ޚިދުމަތްތެރިޔާ, ފުނާޑު, ހުސްނުހީނާގެ ޢަބްދުލްޢަޒީޒް މުޙައްމަދު ނިޔާވެއްޖެ އެވެ.
އަޒީ އަކީ ޚިދުމަތްތެރި ތަޢުލީމީ ޢާއިލާއަކަށް ނިސްބަތްވެވަޑައިގަންނަވާ، ހުނަރުވެރި ކުޅަދާނަ ބޭފުޅެކެވެ. އޭނާ އަކީ ދެކުނުގެ ތައުލީމަށް ވަރަށް ބޮޑު ހިދުމަތެއް ކުރެއްވި ބޭފުޅެކެވެ.
ވަކީން ޚާއްޞަކޮށް، 1960 ގެ އަހަރުތަކުގައި، އައްޑޫ ނޫރާނީ ސްކޫލުގައި އިނގިރޭސިބަހުގެ ޓީޗަރެއްގެ ގޮތުގައި އެތައް ކުއްޖަކަށް އުނގަންނައިދެއްވި އެވެ. އަދި އޭގެފަހުން ކަނޑުދަތުރުފަތުރުގެ ދާއިރާގައި 30 އަހަރަށްވުރެ ގިނަ ދުވަހު މަސައްކަތް ކުރެއްވި އެވެ. އޭނާ އަކީ ކާގޯ ބޯޓުފަހަރުގެ ކެޕްޓަނެއްގެ ގޮތުގައި ދުނިޔޭގެ އެކި ޤައުމުތަކަށް ދަތުރުކުރެއްވުމުގައި ދިގުމުއްދަތަކު އުޅުއްވި ބޭފުޅެކެވެ.
އަޒީ ނިޔާވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ތައުޒިޔާ ވިދާޅުވެފަ އެވެ. އަޒީގެ މި ޚިދުމަތްތައް ފާހަަގަ ކުރައްވާ ރައީސް ވަނީ ޢަބްދުލްޢަޒީޒް މުޙައްމަދު އަޅުގަނޑުމެންނާ ވަކިވެވަޑައިގަތުމަކީ، ތަޖުރިބާކާރު ހަރުދަނާ ޝަޚްޞިއްޔަތެއް ގެއްލިދިޔުން ކަމުގައި ސިފަކުރައްވާފަ އެވެ.
"ހިތާމައިގެ މި ދަނޑިވަޅުގައި، މަރްޙޫމްގެ ޢާއިލާއަށް ވަރަށް އިޚުލާޞްތެރިކަމާއެކު ތަޢުޒިޔާ ދަންނަވަން. މާތްﷲގެ ރުއްސެވުމާއި ރަޙްމަތުގައި، ސުވަރުގޭގެ ދާއިމީ ނިޢުމަތުގައި މަރްޙޫމް ލަހައްޓަވާށި," ރައީސްގެ ޕޯސްޓްގައި ވެ އެވެ.
Advertisement
This content is created and paid for by advertisers and does not involve Voice Journalists
