އިނގިރޭސިވިލާތުގެ އާސެނަލް ބަލިކޮށް ޔުއެފާ ޗެމްޕިއަންސްލީގް ތަށި ފްރާންސްގެ ޕީއެސްޖީން ދިފާއުކޮށްފިއެވެ.
ހަންގޭރީގައި ކުޅުނު ޗެމްޕިއަންސްލީގްގެ ފައިނަލް މެޗް ކާމިޔާބުކޮށް ޕީއެސްޖީން ތަށި ހޯދާފައިވަނީ ފައިނަލްގައި ޕެނަލްޓީ ޖަހައިގެން 4-3 ގެ ނަތީޖާއިން އާސެނަލްގެ މައްޗަށް ކުރިހޯދައިގެންނެވެ.
ޕެނަލްޓީ ޖަހައިގެން މެޗްގެ ނަތީޖާ ނެރެފައިވަނީ މެޗްގެ ފުރިހަމަ ވަގުތުގެ ކުޅުމާއި އިތުރު ވަގުތުގެ ދެހާފްގެ ކުޅުން ނިމުނުއިރުވެސް ނަތީޖާ ނުނެރެ ވުމުންނެވެ.
މެޗްގައި އެންމެ ފުރަތަމަ ލަނޑެއް ޖަހައި ކުރީ ހޯދީ އާސެނަލުންނެވެ. އެއީ މެޗްގެ ފަސްވަނަ މިނެޓް ތެރޭގައި ކައި ހަވާޓްޒް ކާމިޔާބުކޮށްދިން ލަނޑުންނެވެ. ޕީއެސްޖީން މެޗް ޑޮމިނޭޓް ކުރި މިމެޗްގެ ފުރަތަމަ ހާފް ނިމުނީ އާސެނަލް ކުރީގައި އޮވެގެންނެވެ. އާސެނަލުން ލީޑް ނަގާފައިވަނިކޮށް ޕީއެސްޖީން އެއްވަރުކޮށްފައިވަނީ، 65 ވަނަ މިނެޓް ތެރޭގައި ޑެމްބްލޭ ކާމިޔާބުކޮށްދިން ލަނޑުންނެވެ. މިއީ ޕީއެސްޖީއަށް ލިބުނު ޕެނަލްޓީއަކުން ޖެހި ލަނޑެކެވެ. މެޗްގައި ޕީއެސްޖީން އާސެނަލްގެ ޑިފެންސް ލައިނަށް ނުރައްކާ ކުރިއިރު، އާސެނަލުންވެސް ވަނީ ކައުންޓަރ އެޓޭކްގައި ޕީއެސްޖީގެ ގޯލަށް ނުރައްކާކޮށްފައެވެ.
މެޗްގެ ޕެނަލްޓީ ޝޫޓް އައުޓްގައި އާސެނަލަށް ކާމިޔާބު ނުކުރެވުނީ އެޒޭ އަދި ގެބްރިއަލް ޖެހި ޕެނަލްޓީއެވެ. ޕީއެސްޖީގެ ނޫނޯ މެންޑޭޒް ޖެހި ޕެނަލްޓީ ފިޔަވައި އެހެން ކުޅުންތެރިން ޖެހި ޕެނަލްޓީ ވަނީ ކާމިޔާބުކޮށްފައެވެ.
Advertisement
This content is created and paid for by advertisers and does not involve Voice Journalists
