ޖަޕާނުގެ ޓޯކިޔޯގެ އެންމެ ކާރޫބާރު ބޮޑު އެއް ސަރަހައްދު ކަމަށްވާ ޝިބުޔާ ވޯޑުގެ މަގުތަކަށާއި ޕާކުތަކަށް ކުނި އަޅާ މީހުން ވަގުތުން ޖޫރިމަނާ ކުރަން ފަށައިފިއެވެ.

ހޯމަ ދުވަހުން ފެށިގެން އަމަލުކުރަން ފެށި މި އުސޫލުގެ ދަށުން، ކުނި އަޅާ ކޮންމެ މީހަކު 2،000 ޖަޕަނީޒް ޔެން (ގާތްގަނޑަކަށް 13 ޑޮލަރު) އިން ޖޫރިމަނާ ކުރާނެއެވެ.

މަޝްހޫރު 'ޝިބުޔާ ކްރޮސިން' ހިމެނޭ މި ވިޔަފާރި އަދި މުނިފޫހިފިލުވުމުގެ ސަރަހައްދު ސާފުކޮށް ބޭއްވުމަށް ހިންގާ މި ކެމްޕޭނުގެ ޝިއާރަކީ "ކުނި އުކާލައިފިނަމަ، ފައިސާ ގެއްލޭނެ" (if you throw trash, you lose cash) އެވެ. މި ޖޫރިމަނާ ފައިސާ ނަގާނީ އެވަގުތުން ވަގުތަށެވެ. ފައިސާ ދެއްކުމުގައި ނަގުދު ފައިސާގެ އިތުރުން ކްރެޑިޓް ކާޑާއި ކިއުއާރް ކޯޑު މެދުވެރިކޮށް ވެސް ފައިސާ ދެއްކޭނެ އިންތިޒާމު ވަނީ ހަމަޖައްސާފައެވެ.

ޝިބުޔާގެ ކަމާބެހޭ ފަރާތްތަކުން ހާމަކުރި ގޮތުގައި، މި އުސޫލު ތަންފީޒު ކުރުމަށްޓަކައި 50 އަށް ވުރެ ގިނަ އޮފިޝަލުން އެކި ސަރަހައްދުތަކުގައި ފޯރިމަރަމުންދާނެއެވެ. އަދި ކުނި އަޅާ މީހުންގެ އިތުރުން، ކުނި ވަށިގަނޑު ބަހައްޓާފައި ނުވާ ކާބޯތަކެތި ވިއްކާ ތަންތަން ހިންގާ ފަރާތްތައް ވެސް ޖޫރިމަނާ ކުރާނެ ކަމަށް އޮފިޝަލުން ވިދާޅުވިއެވެ.

ޖަޕާނުގެ ގައުމީ ބްރޯޑްކާސްޓަރު އެން.އެޗް.ކޭ އިން ރިޕޯޓްކޮށްފައިވާ ގޮތުގައި، ޝިބުޔާ ސަރަހައްދުގައި ފަތުރުވެރިން ހިމެނޭހެން ގިނަ ބަޔަކު މަގުތަކަށް ކުނި އެޅުން ވަނީ ވަރަށް ބޮޑަށް އިތުރުވެފައެވެ. ޝިބުޔާ ވޯޑުން ނެރުނު ބަޔާނެއްގައި ބުނެފައިވަނީ، ކުނި ވަށިގަނޑު ނެތުމަކީ މަގުމައްޗަށް ކުނި އެޅުމަށް އޮތް އުޒުރެއް ނޫން ކަމަށާއި، އެންމެންނަށް އުފަލުގައި އުޅެވޭނެ މާހައުލެއް ގާއިމުކުރުމަށް އެންމެންގެ އެއްބާރުލުން ބޭނުންވާ ކަމަށެވެ.

ޖަޕާނަކީ އާންމު ތަންތަނުގައި ކުނި ވަށިގަނޑު ވަރަށް މަދު ގައުމެކެވެ. އެގޮތުން މީގެ ކުރިން އެގައުމުގައި ދީފައިވާ ބައެއް ނުރައްކާތެރި ހަމަލާތަކާ ގުޅިގެން ސަލާމަތީ ފިޔަވަޅެއްގެ ގޮތުން ކުނިވަށިގަނޑުތައް މަދުކުރިއެވެ. މިދިޔަ އަހަރު ސަރުކާރުން ކުރި ސާވޭއަކުން ދައްކާގޮތުގައި، ޖަޕާނަށް ޒިޔާރަތްކުރާ ފަތުރުވެރިންނަށް ކުރިމަތިވާ އެންމެ ބޮޑު ދަތިކަމަކީ އާންމު ތަންތަނުގައި ކުނިވަށިގަނޑު ނެތުމެވެ.

2025 ވަނަ އަހަރު ޖަޕާނަށް ރެކޯޑު އަދަދަކަށް، 42.7 މިލިއަން ފަތުރުވެރިން ޒިޔާރަތްކޮށްފައިވާއިރު، މި އިތުރުވުމުގެ ސަބަބުން އެގައުމުގެ އުމްރާނީ ވަސީލަތްތަކަށް ވަނީ ބާރުބޮޑުވެފައެވެ. ފޫޖީ ފަރުބަދަ ކައިރީގައި އޮންނަ ފުޖިޔޮޝިދާ ފަދަ ރަށްރަށުގައި ވެސް ޓްރެފިކް ތޮއްޖެހުމާއި ކުނީގެ މައްސަލަ ބޮޑުވެ، މިއަހަރުގެ 'ޗެރީ ބްލޮސަމް' ފެސްޓިވަލް ވެސް ވަނީ ކެންސަލްކޮށްފައެވެ.

ފަތުރުވެރިން އިތުރުވުމުން ކުރިމަތިވާ މިފަދަ މައްސަލަތައް ހައްލުކުރުމަށް ޖަޕާން ސަރުކާރުން ދަނީ ގިނަ ފިޔަވަޅުތަކެއް އަޅަމުންނެވެ. މީގެ ތެރޭގައި ފަތުރުވެރިންގެ އަތުން ނަގާ ޓެކްސް ބޮޑުކުރުމާއި، އެކި ސަރަހައްދުތަކުގައި މީހުން ތޮއްޖެހިފައިވާ މިންވަރު ވަގުތުން ބަލާލެވޭނެ އެޕްލިކޭޝަންތައް ތައާރަފުކުރުން ހިމެނެއެވެ.