މ. ވޭވަށު ކައުންސިލްގެ އިންތިޚާބާ ގުޅިގެން ހައިކޯޓުން ނިންމި ނިންމުން އެމްޑީޕީގެ ފަރާތުން ސުޕްރީމް ކޯޓުގައި އިސްތިއުނާފު ކުރުމުން، އެ މައްސަލަ ބަލައިގަތުމަށް ސުޕްރީމް ކޯޓުން ނިންމައިފިއެވެ.

މިދިޔަ އޭޕްރީލް މަހު ބޭއްވުނު ކައުންސިލް އިންތިޚާބުގައި ވޭވަށު ކައުންސިލްގެ ގޮނޑިއަށް ވާދަކުރެއްވި އެމްޑީޕީގެ ކެންޑިޑޭޓް އަހްސަން ނައީމަށް 121 ވޯޓު ލިބުނުއިރު، ޕީއެންސީގެ ކެންޑިޑޭޓް މުހައްމަދު ނަޒީހަށް ލިބުނީ 119 ވޯޓެވެ.

ދެ ވޯޓުގެ ތަފާތުން އަހްސަން އިންތިޚާބު ކާމިޔާބު ކުރެއްވި ނަމަވެސް، އިންތިޚާބުގެ ނަތީޖާއާ މެދު ހިތްހަމަނުޖެހިގެން ޕީއެންސީގެ ކެންޑިޑޭޓް ވަނީ ބައެއް ވޯޓުތައް ބާތިލުކުރަން އެދި ހައިކޯޓަށް މައްސަލަ ހުށަހަޅާފައެވެ.

ހައިކޯޓުން މި މައްސަލަ ބެލުމަށްފަހު، ތިން ފަނޑިޔާރުންގެ ބެންޗުގެ އަޣުލަބިއްޔަތުން ނިންމީ އަހްސަން ނައީމަށް ލިބުނު ވޯޓުތަކުގެ ތެރެއިން ތިން ވޯޓެއް ބާތިލު ކަމަށެވެ. މި ނިންމުމާއެކު ނަޒީހަށް 119 ވޯޓު ލިބި، އަހްސަންގެ ވޯޓު 118 އަށް ތިރިވެ، އެ ގޮނޑި ޕީއެންސީގެ ކެންޑިޑޭޓަށް ލިބޭ ގޮތަށް ނަތީޖާ ބަދަލުވިއެވެ.

ދެ ފަނޑިޔާރުން އެފަދައިން ނިންމެވި ނަމަވެސް، ބެންޗުގައި ހިމެނިވަޑައިގަތް ފަނޑިޔާރު އިބްރާހީމް މާހިރު ވަނީ ނަތީޖާ ބަދަލުކުރަން ޖެހޭ ސަބަބެއް ނެތް ކަމަށް ވިދާޅުވެ ތަފާތު ރައުޔެއް ނެރުއްވާފައެވެ.

ހައިކޯޓުގެ މި ހުކުމް އެމްޑީޕީ އާއި އެ ޕާޓީގެ ކެންޑިޑޭޓް އަހްސަންގެ ފަރާތުން ސުޕްރީމް ކޯޓުގައި އިސްތިއުނާފު ކުރުމުން، އެ ކޯޓުގެ ރެޖިސްޓްރާ ވަނީ މައްސަލަ ބަލައިގަނެފައެވެ.

މި މައްސަލައިގައި މައިގަނޑު ބަހުސަކަށް ވެފައިވަނީ ބާތިލުކުރި ތިން ވޯޓު ކަރުދާހުގައި ހުރި ފާހަގަތަކެކެވެ. އިލެކްޝަންސް ކޮމިޝަނުން ކޯޓުގައި ބުނެފައިވަނީ އެ ފާހަގަތަކަކީ ވޯޓުލީ މީހާ ގަސްތުގައި ޖަހާފައިވާ ފާހަގަތަކެއް ނޫން ކަމަށާއި، އެއީ ކަރުދާސް ޕްރިންޓް ކުރުމުގެ ތެރޭގައި ދެލި ފޭދިގެން ހުރި ކުދި ތިކިތަކެއް ކަމަށެވެ.