އިނގުރައިދޫއަށް ނިސްބަތްވާ ދެބެން ކަމަށްވާ އަޙްމަދު ސާމިރާއި އާދިލް ހާލިދު އެ ރަށުގެ 17 ކުއްޖަކަށް ހިންގި ޑައިވް ކޯސް ކާމިޔާބުކަމާއެކު ނިންމާލައި ބައިވެރިންނަށް ސެޓްފިކެޓް ދީފިއެވެ.

މިއަހަރުގެ މެއިމަހު ކުރިއަށްގެންދިޔަ މި ކޯހުގައި ބައިވެރިވެފައިވަނީ އިނގުރައިދޫ ސްކޫލްގައި ކިޔަވަމުންދާ ދަރިވަރުންނެވެ. މިއީ އާއްމުކޮށް ބައިވެރިވުމަށް ހުޅުވާލުމަށްފަހު ކުރިއަށްގެންދިޔަ ޕީއެސްއެސް އޯޕަން ވޯޓަރ ޑައިވަރ ކޯހެވެ.

ކޯސް ހިންގި ދެ އިންސްޓްރަކްޓަރުންގެ ތެރެއިން ސާމިރަކީ މި ދާއިރާގައި 23 އަހަރު ހޭދަކޮށްފައިވާ ތަޖުރިބާކާރެކެވެ. އާދިލްވެސް ވަނީ 12 އަހަރު ޑައިވަރެއްގެ ގޮތުގައި މަސައްކަތްކޮށްފައެވެ. މި ކޯޙުގައި 10 އހަަރާއި 12 އަހަރުގެ ދަރިވަރުން ބައިވެރިވިއިރު، އެ ކުދިންނަށް 12 މީޓަރު އަޑިއަށް ފީނޭވަރަށް ވަނީ ތަމްރީން ހަދައިދީފައެވެ. 

ޑައިވްކޯސް ނިންމުމުގެ ރަސްމިއްޔާތުގެ ތެރެއިން ސާމިރު ކޯހުގެ ބައިވެރިއަކަށް ސެޓްފިކެޓް ހަވާލުކޮށްދެއްވަނީ

ކޯސް ކުރިއަށްގެންގޮސްފައިވަނީ ބައިވެރިވި ހުރިހާ ދަރިވަރުންވެސް އިންޝުއަރަންސްކޮށްގެންނެވެ. ސާމިރު ބުނީ ކޯސް ނިންމި ކުދިންނަށް އަމިއްލައަށް ފީނޭވަރަށް ތަމްރީން ލިބިފައިވާނޭކަމަށާއި، އެކުދިން އެހެން ލެވެލްއަކަށް ދާން ބޭނުންނަމަ، އެކަމުގައި އެހީތެރިކަން ދޭނޭކަމަށެވެ.

ޑައިވްކޯސް ނިންމުމުގެ ރަސްމިއްޔާތުގެ ތެރެއިން އާދިލް ކޯހުގެ ބައިވެރިއަކަށް ސެޓްފިކެޓް ހަވާލުކޮށްދެއްވަނީ

މި ކޯސް ކުރިއަށްދިޔައިރު، އެކަމަށް ބޭނުންވާ ވަސީލަތްތައް ހޯދާފައިވަނީ، ސާމިރާއި އާދިލްގެ އިތުރުން އިނގުރައިދޫ ކައިރީ ރިސޯޓެއްގެ ޑައިވް ސެންޓަރަކުންނެވެ. ކޯސް ނިންމުމުގެ ރަސްމިއްޔާތުގައި އިނގުރައިދޫ ކައުންސިލާއި، ސްކޫލާއި، ފުލުހުންގެ އިތުރުން ދަރިވަރުންގެ ބެލެނިވެރިން ވަނީ ބައިވެރިވެފައެވެ.

ޑައިވްކޯސް ނިންމުމުގެ ރަސްމިއްޔާތުގެ ތެރެއިން 

ސާމިރާއި އާދިލް ޑައިވިންގެ ދާއިރާއިން ކުރިއަށްދިއުމަށް ޝައުގުހުންނަ ޒުވާނުންނަށް ފުރުސަތުތައް ހޯދައިދެމުންދާއިރު، އެ ދެބެއިން ވަނީ މީގެ ކުރިންވެސް ބައެއް ދަރިވަރުންނަށް ޑައިވްކުރުމުގެ ތަމްރީނުތައް ދީފައެވެ.