އެމްޑީޕީގެ ޗެއަރޕާސަން ހޮވުމަށް ބާއްވާ އިންތިޚާބުގައި ބައެއް ރަށްރަށުގައި ވޯޓު ފޮށި ބެހެއްޓުމާ މެދު އިންތިޚާބާ ބެހޭ ކޮމިޓީގެ ނިންމުމާ ޚިލާފަށް ޢަމަލުކުރަމުންދާ ކަމަށް ބުނެ ޗެއާޕާސަން ކަމަށް ވާދަކުރައްވާ މީކާއީލް އަޙްމަދު ނަސީމް ޝަކުވާ ހުށަހަޅައިފިއެވެ.
އެމްޑީޕީ ޗެއާޕާސަނަށް މީކާއިލް ފޮނުއްވި ސިޓީގައި ވިދާޅުވެފައި ވަނީ އިންތިޚާބުގައި ވާދަވެރިކަން ބޮޑުވެފައިވާތީ އިންތިޚާބާ ބެހޭ ކޮމިޓީން ނިންމާފައި ވަނީ ކޮންމެ ރަށެއްގެ ވެސް ސްކޫލްގައި ވޯޓުލުމުގެ ކަންކަން ކުރިއަށް ގެންދިއުމަށް ކަމަށެވެ. ނަމަވެސް ކޮމިޓީގެ އެ ނިންމުމާ ޚިލާފަށް ބައެއް ރަށްރަށުގައި ހަރުގޭގައި ވޯޓު ފޮށި ބެހެއްޓުމަށް ނިންމާފައިވާ ކަމަށް އޭނާ ވިދާޅުވިއެވެ.
މި ގޮތަށް ކޮމިޓީގެ ނިންމުމާ ޚިލާފަށް ހަރުގޭގައި އިންތިޚާބު ކުރިއަށް ގެންދަން ނިންމާފައިވާ ކަމަށް ބުނެފައިވާ ރަށްތަކަކީ، ފ. ފީއަލި، ލ. އިސްދޫ ދާއިރާގެ އިސްދޫ އަދި ކަލައިދޫ ގއ. ވިލިނގިލި ދާއިރާގެ ވިލިނގިލި އަދި ލ. ގަމު ދާއިރާގެ މަތިމަރަދޫއެވެ.
އިންތިޚާބުގައި، ވޯޓުލުމާއި، ވޯޓުގުނުމުގެ ކަންކަން ވީހާވެސް އިންސާފުވެރިކޮށް، އަދި ޑިމޮކްރެޓިކް ހަމަތަކާއި، އެއްގޮތަށް، ކުރިޔަށް ގެންދިއުމުގެ މަގުސަދުގައި، ނިންމާފައިވާ މިފަދަ މުހިއްމު ނިންމުންތަކާއި ޚިލާފަށް އަދި މުޅި ރާއްޖޭގެ އެތައްރަށެއްގައި އެތައް ވޯޓް ފޮއްޓެއް ކޮމެޓީގެ ނިންމުމާއި އެއްގޮތަށް، މުއައްސާއަކުގައި ބެހެއްޓުމަށް ނިންމާފައިވަނިކޮށް އެ ހަތަރު ރަށުގައި މަގުބޫލު ސަބަބެއްނެތި ކޮމެޓީގެ ނިންުމާއި ޚިލާފަށް ފޮށި ބެހެއްޓުމަށް ނިންމާފައިވުމަކީ މިކަމާއިމެދު އަޅުގަނޑު ކަންބޮޑުވާ، އަދި ހައްލެއް ބޭނުންވާ ކަމެއްކަމުގައި ދަންނަވަމެވެ
މީކާއިލް
މީކާއީލް ވިދާޅުވެފައި ވަނީ ވަކިން ޚާއްޞަކޮށް ފ. ފީއަލީގެ ކެމްޕެއިނުގައި ކުރެއްވި ދަތުރުގައި އިދިކޮޅު ކެންޑިޑޭޓުގެ ސަޕޯޓަރުން ފާޅުގައި ވޯޓު ފޮށްޓަށް ގަނޑުކޮށް ވޯޓު އަޅާނެ ކަމަށް ބުނެފައިވާ ކަމަށެވެ.
އެހެންކަމުން ވޯޓުލާ މަރުކަޒު މި ގޮތަށް ބަދަލުކުރުމަކީ އެ ބުނުމަށް ބާރު ލިބޭ ކަމެއް ކަމަށާއި ވީހާ ވެސް އަވަހަކަށް އެކަން އިސްލާހުކޮށް ބަދަލުކުރުމަށް އެދޭ ކަމަށް އޭނާ ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
