އެމްޑީޕީގެ ޗެއަރޕާސަން ހޮވުމަށް ބާއްވާ އިންތިޚާބުގައި ބައެއް ރަށްރަށުގައި ވޯޓު ފޮށިތައް ހަރުގެ ތަކުގައި ބަހައްޓާތީ ޗެއާޕާސަން ކަމަށް ވާދަކުރައްވާ މީކާއީލް އަޙްމަދު ނަސީމް ޝަކުވާ ހުށަހެޅުއްވުމާ ގުޅިގެން ފޮށިތައް ބަހައްޓާތަން ބަދަލުކޮށްފިއެވެ.
ޗެއާޕާސަން އިންތިޚާބުގައި ވާދަވެރިކަން ބޮޑުވެފައިވާތީ އިންތިޚާބާ ބެހޭ ކޮމިޓީން ނިންމާފައި ވަނީ ކޮންމެ ރަށެއްގެ ވެސް ސްކޫލްގައި ވޯޓުލުމުގެ ކަންކަން ކުރިއަށް ގެންދިއުމަށެވެ.
ނަމަވެސް ކޮމިޓީގެ އެ ނިންމުމާ ޚިލާފަށް ބައެއް ރަށްރަށުގައި ހަރުގޭގައި ވޯޓު ފޮށި ބެހެއްޓުމަށް ނިންމާފައިވާ ކަން މީކާއީލް ވަނީ ފާހަގަކުރައްވާފައެވެ.
މި ގޮތަށް ކޮމިޓީގެ ނިންމުމާ ޚިލާފަށް ހަރުގޭގައި އިންތިޚާބު ކުރިއަށް ގެންދަން ނިންމާފައިވާ ކަމަށް ބުނެފައިވާ ރަށްތަކަކީ، ފ. ފީއަލި، ލ. އިސްދޫ ދާއިރާގެ އިސްދޫ އަދި ކަލައިދޫ ގއ. ވިލިނގިލި ދާއިރާގެ ވިލިނގިލި އަދި ލ. ގަމު ދާއިރާގެ މަތިމަރަދޫއެވެ.
އެކަމަށް ހައްލެއް ހޯދައިދޭން އެދި ޗެއާޕާސަނަށް މީކާއީލް ސިޓީ ފޮނުއްވާފައިވާއިރު، މިހާރު އެ ފޮށިތައް ބަހައްޓާތަން ބަދަލުކުރެވިފައިވާ ކަމަށް އެމްޑީޕީން ވަނީ އިއުލާން ކޮށްފައެވެ.
އެމްޑީޕީގެ ޗެއާޕާސަން އިންތިޚާބު އޮންނާނީ 12 ޖޫން 2026 ވާ ހުކުރު ދުވަހުއެވެ. މަގާމަށް ވާދަކުރައްވަނީ މީކާއީލް އާއި ކުރީގެ ރައީސް މުހައްމަދު ނަޝީދެވެ.
Advertisement
This content is created and paid for by advertisers and does not involve Voice Journalists
