އިންޑިއާގެ ބޮޑުވަޒީރުކަމުގެ މަގާމު މެދުނުކެނޑި އެންމެ ގިނަދުވަހު އަދާކުރެއްވި ބޭފުޅާގެ ޝަރަފު ނަރެންދުރަ މޯދީއަށް ލިބިވަޑައިގަތުމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ފޮނުއްވައިފިއެވެ.

މިއަދު އެކްސްގައި ކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ، އިންޑިއާއާއެކު އޮތް ގުޅުން އިތުރަށް ހަރުދަނާކުރުމަށް ރާއްޖެއިން އުއްމީދުކުރައްވާ ކަމަށެވެ.

އަދި ދެ ގައުމުގެ ދެމެދުގައި އޮންނަ އެއްބާރުލުން ކުރިއަށްދާނީ ދެފަރާތުގެ އިޙްތިރާމާއި، މިނިވަންކަމާއި އިސްތިޤުލާލުގެ ހަމަހަމަކަމުގެ މައްޗަށް ބިނާވެގެންކަން ރައީސް ފާހަގަކުރެއްވިއެވެ.

އަދި ދެ ގައުމުގެ މަސްލަހަތު ހިމެނޭ ކަންކަމުގައި ގުޅިގެން މަސައްކަތްކުރުމަށް ދިވެހިރާއްޖެއިން ތައްޔާރަށް އޮތްކަންވެސް އެމަނިކުފާނު ފާހަގަކުރެއްވިއެވެ.

މިއަދަކީ މެދުނުކެނޑި އިންޑިޔާގައި އެންމެ ގިނަ ދުވަހު ބޮޑުވަޒީރުކަން ކުރެއްވި ބޭފުޅާގެ ޝަރަފު މޯދީއަށް ލިބިވަޑައިގެންނެވި ދުވަހެވެ.

އޭނާ މިވަނީ އިންޑިއާގެ ފުރަތަމަ ބޮޑުވަޒީރު ޖަވާހަރްލާލް ނެހުރޫ ހެއްދެވި ރެކޯޑު މުގުރާލައްވައި، މެދުނުކެނޑި 4,399 އަށްވުރެ ގިނަ ދުވަހު މަގާމުގައި ދެމިހުންނެވި ބޭފުޅާގެ ލަގަބު ހޯއްދަވާފައެވެ. މޯދީ އެންމެ ފުރަތަމަ މަގާމުގެ ހުވާ ކުރެއްވީ 26 މެއި 2014 ގައެވެ.