މަޤާމުގައި މެދުކެނޑުމެއްނެތި އެންމެ ގިނަ ދުވަހު ޚިދުމަތް ކުރެއްވި އިންޑިއާގެ ބޮޑުވަޒީރުކަމުގެ ޝަރަފު ނަރެންދުރަ މޯދީ ހޯއްދެވުމާ ގުޅިގެން، ކުރީގެ ފޮރިން މިނިސްޓަރު އަދި އެމްޑީޕީގެ ރައީސް ޢަބްދުالله ޝާހިދު އެމަނިކުފާނަށް މަރުޙަބާ ވިދާޅުވެއްޖެއެވެ.
ބޮޑުވަޒީރު މޯދީ ޖެހިޖެހިގެން 4،399 ދުވަސް ވަންދެން މަޤާމުގައި ދެމިހުންނެވި މި ތާރީޚީ ދުވަހާ ގުޅިގެން ޝާހިދު ކުރެއްވި އެކްސް ޕޯސްޓެއްގައި ވިދާޅުވީ، މި ކާމިޔާބީން ރަމްޒުކޮށްދެނީ އާންމު ޚިދުމަތުގައި މޯދީ ހޭދަކުރެއްވި ދިގު އަހަރުތަކާއި، ދުރުވިސްނޭ ހިކުމަތްތެރި ލީޑަޝިޕް އަދި އިންޑިއާގެ ކުރިއެރުމަށް ކުރައްވާ މިންނެތް މަސައްކަތް ކަމަށެވެ. މިއާއެކު މޯދީ ވެވަޑައިގެންފައިވަނީ އިންޑިއާގެ ތާރީޚުގައި ވެސް އެންމެ ގިނަ ދުވަހު ޖެހިޖެހިގެން ބޮޑުވަޒީރުކަން ކުރެއްވި ލީޑަރަށެވެ.
ބޮޑުވަޒީރު މޯދީގެ ލީޑަޝިޕްގެ ދަށުން އިންޑިއާއަށް އައިސްފައިވާ ބޮޑެތި ބަދަލުތަކަށް އަލިއަޅުއްވާލައްވަމުން ޝާހިދު ވިދާޅުވީ، އެމަނިކުފާނުގެ އިރުޝާދުގެ ދަށުން އިންޑިއާއިން އިޤްތިޞާދީ ގޮތުންނާއި އިޖުތިމާޢީ ގޮތުން ބޮޑެތި ކުރިއެރުންތަކެއް ހޯދައި، އާ އީޖާދުތަކާއި ޑިޖިޓަލް ރޮނގުންނާއި އުމްރާނީ ތަރައްޤީގެ ބިޔަ މަޝްރޫޢުތަކުން ބޮޑެތި ކާމިޔާބީތަކެއް ހާސިލުކޮށްފައިވާ ކަމަށެވެ.
މީގެ އިތުރުން، އިންޑިއާގެ ޚާރިޖީ ސިޔާސަތު ވަރުގަދަކޮށް، އަވަށްޓެރި ޤައުމުތަކާއި ދުނިޔޭގެ އެހެން ޤައުމުތަކާއެކު އޮތް ގުޅުން އިތުރަށް ބަދަހިކޮށް، ދުނިޔޭގެ ކުރިއަރާފައިވާ ބާރެއްގެ ގޮތުގައި އިންޑިއާގެ މަޤާމު އުފުލައިދީފައިވާކަން ވެސް ޝާހިދު ފާހަގަކުރެއްވިއެވެ.
ޝާހިދުގެ މެސެޖުގައި، އިންޑިއާގެ 'ނެއިބަހުޑް ފަސްޓް' ސިޔާސަތުގެ ދަށުން ރާއްޖެއަށް އަބަދުވެސް ޚާއްޞަ އިސްކަމެއް ދެއްވާނެ ކަމަށް ބޮޑުވަޒީރު މޯދީ ތަކުރާރުކޮށް ވިދާޅުވެފައިވާކަން ފާހަގަކުރެއްވިއެވެ.
އަދި އޭގެ ނަތީޖާއެއްގެ ގޮތުން، ދިވެހިރާއްޖެއާއި އިންޑިއާގެ ގުޅުން ކުރިއަށްވުރެ ފުޅާވެ، އިތުރަށް ބަދަހިވެގެން ގޮސްފައިވާ ކަމަށާއި، ރާއްޖޭގެ އެންމެ އިތުބާރު ހުރި އަވަށްޓެރިޔާގެ ގޮތުގައްޔާއި، ކަމެއް ދިމާވާ ހިނދު އެންމެ ފުރަތަމަ އެހީތެރިކަން ފޯރުކޮށްދޭ ފަރާތުގެ ގޮތުގައި، އަދި ތަރައްޤީގެ މުހިންމު ބައިވެރިއެއްގެ ގޮތުގައި އިންޑިއާގެ ދައުރު ބޮޑުވެފައިވާ ކަމަށް ޝާހިދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
