އަތޮޅު ކައުންސިލްތައް އުވާލުމާ ގުޅިގެން އެ ކައުންސިލްތަކުގައި މަސައްކަތް ކުރެއްވި ހުރިހާ ސެކްރެޓަރީ ޖެނެރަލުން އިއްޔެ މަގާމުން ވަކިކޮށްފިއެވެ.
ސިވިލް ސާވިސް ކޮމިޝަނުން ބުނި ގޮތުގައި ގަވާއިދާ އެއްގޮތަށް ނޯޓިސްގެ މުއްދަތުގެ ފައިސާ އަދި ރިޑަންޑެންސީ އިނާޔަތް ލިބޭ ގޮތަށް އެސްޖީން ވަނީ ވަކިކޮށްފައެވެ.
ސެކްރެޓަރީ ޖެނެރަލުންނަކީ ކައުންސިލްތައް އިދާރީ ގޮތުން ހިންގުމުގެ އެންމެ އިސް ފަރާތެވެ.
އަތޮޅު ކައުންސިލްތައް އުވާލައި އެ އިންތިހާބުގައި އަތޮޅު ކައުންސިލަރުން އިންތިހާބު ކުރަން ނުޖެހޭ ގޮތަށް ހެދުމަށް ސަރުކާރުގެ ފަރާތުން ގާނޫނުއަސާސީއަށް އިސްލާހު ގެނައީ މިދިޔަ އަހަރުގެ ފަހުކޮޅުއެވެ.
ސަރުކާރުގެ ފަރާތުން ޕީއެންސީއަށް ނިސްބަތްވެވަޑައިގަންނަވާ ބާރަށު ދާއިރާގެ މެންބަރު އިބްރާހީމް ޝުޖާއު ހުށަހެޅުއްވި އެ އިސްލާހަކީ ކައުންސިލްތަކުގެ ދައުރު ހަމަވުމާ އެކު އެ ކައުންސިލްތައް އުވޭ ގޮތަށް ގެނައި ބަދަލެކެވެ.
މިދިޔަ މަހުގެ 17 ގައި އާ ކައުންސިލަރުން ހުވާކުރުމާ އެކު އަތޮޅު ކައުންސިލްތައް އުވި އެ ތަންތަން ވަނީ އެލްޖީއޭގެ އަތޮޅު އޮފީހަށް ބަދަލުކޮށްފައެވެ.
Advertisement
This content is created and paid for by advertisers and does not involve Voice Journalists
