ރާއްޖެއިން ކޮރަޕްޝަނުގެ ވަބާ ނައްތާލުމުގައި އެންމެ މުހިންމު ދައުރެއް އަދާކުރެވޭނީ ސިވިލް ސާވިސްގެ މުއައްޒަފުންނަށްކަމަށް ތައުލީމާ ބެހޭ ވަޒީރު، ޑރ. އިސްމާއީލް ޝަފީއު ވިދާޅުވެއްޖެއެވެ.

މިއަދު ފެށި މިއަހަރުގެ ސިވިލް ސާވިސް ކޮންފަރެންސް ހުޅުވުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުން ޝަފީއު ވިދާޅުވީ، ކޮންމެ ސަރުކާރެއް އޮތްނަމަވެސް ސަރުކާރުން ރައްޔިތުންނަށްދޭ ހިދުމަތްތައް ދޭ ބަޔަކީ ސިވިލް ސާވިސްގެ މުއައްޒަފުންކަމަށެވެ. ވަޒީރު ވިދާޅުވީ ރައްޔިތުންގެ ފައިސާއިން ފައިސާ ލިބޭ ރައްޔިތުންގެ އޮފީހަކަށް ހާޒިރުވާ ކޮންމެ މުވައްޒަފެއްގެ ފަރާތުން ރައްޔިތުން އެދޭނީ ހަލުވިކަމާއެކު މަސައްކަތް ކުރުންކަމަށެވެ. އެގޮތުން ސިވިލް ސާވިސް މުއައްޒަފުންގެ ފަރާތުން ރައްޔިތުން އެދެނީ ފަރުވާތެރިކަމާއެކު ހިދުމަތް ދިނުންކަމަށެވެ.

ސިވިލް ސާވިސް ދާއިމީ މުވައްޒަފުންގެ ގޮތުގައި 32،000 އަދި ކޮންޓްރެކްޓް މުއައްޒަފުންނާއެކު 35،000 މުއައްޒަފުން އުޅޭނޭކަން ފާހަގަކުރައްވަމުން ވަޒީރު ވިދާޅުވީ، ބިދޭސީންވެސް ހިމެނޭގޮތަށް އާބާދީގެ ކޮންމެ 15 މީހަކަށް ސިވިލް ސާވަންޓެއް އެބަހުރިކަމަށެވެ. އެގޮތުން މިއީ ވަރަށްބޮޑު އަދަދެއް ކަމަށް ވަޒީރު ފާހަގަކުރެއްވިއެވެ.

ވަޒީރުި ވިދާޅުވީ ރައްޔިތުން ސިވިލް ސަރވިސްގެ ދާއިރާއަށް ކުރާ އިތުބާރަށް ވުރެ ބޮޑަށް އިތުބާރު ކުރެވޭ ގޮތަށް ސިވިލް ސާވިސް މުއައްޒަފުންގެ މަސައްކަތް ބައްޓަންކުރަން ޖެހޭަކަމަށެވެ. މާލީބޮޑެތި ކޮރަޕްޝަނުގެ މައްސަލަތައް ފެންމަތިވަނީ އިދާރީ ނިޒާމްގެ ތެރެއިން ހިންގޭ ނޭދެވޭ ކަންތައްތަކުގެ ސަބަބުންކަން ފާހަގަކުރައްވަމުން ވަޒީރު ވިދާޅުވީ، އިދާރީ ހިންގުން ކޮރަޕްޝަންގެ ތެރެއަށް ނުވަންނަނަމަ މާލީގޮތުން ކޮރަޕްޝަން ހިންގުން ބަންދުކުރެވޭނޭކަން ވަޒީރުގެ ވާހަކާގައި ވަނީ ފާހަގަކުރައްވާފައެވެ.

މިއަހަރުގެ ސިވިލް ސާވިސް ކޮންފަރެންސްގައި 300 އަށްވުރެ ގިނަ މީހުން ބައިވެރިވާއިރު، 8 ދާއިރާއަކުން ދިރާސާ ކަރުދާސް ވަނީ ހުށަހަޅާފައެވެ.