އީރާނުގެ ކުރީގެ ރޫހާނީ ލީޑަރު އަލީ ޚާމަނައީ ފަސްދާނުލުމުގެ ރަސްމިއްޔާތު އަންނަ ޖުލައި މަހު ބޭއްވުމަށް ހަމަޖެހިފައިވާ ކަމަށް އެ ގައުމުގެ ދައުލަތުގެ މީޑިއާތަކުން ރިޕޯޓްކޮށްފިއެވެ.

ދައުލަތުގެ މީޑިއާއިން ހާމަކުރި ގޮތުގައި، ޚާމަނައީގެ ޖަނާޒާގެ ކަންކަން ޖުލައި މަހުގެ 4 ވަނަ ދުވަހު ތެހެރާނުގައި ފެށުމަށް ވަނީ ހަމަޖެހިފައެވެ. އަދި އޭނާ ފަސްދާނުލުމަށް ހަމަޖެހިފައިވަނީ ޖުލައި މަހުގެ 9 ވަނަ ދުވަހު އޭނާގެ އުފަން ރަށް ކަމަށްވާ މަޝްހަދުގައެވެ.

މިދިޔަ ފެބުރުވަރީ މަހު އެމެރިކާއާއި އިޒްރޭލުން ގުޅިގެން ދިން ވައިގެ ހަމަލާއެއްގައި އަވަހާރަވީ އިރު ޚާމަނައީގެ އުމުރުކީ 86 އަހަރެވެ. އޭނާ ފަސްދާނުލުމުގެ ކަންކަން އެންމެ ފުރަތަމަ މާޗު މަހު ބޭއްވުމަށް ތާވަލުކުރި ނަމަވެސް، އެމެރިކާއާއި އިޒްރޭލުން އީރާނާ ދެކޮޅަށް ކުރަމުންދިޔަ ހަނގުރާމަ ދިގުލައިގެން ދިއުމާ ގުޅިގެން އެ ރަސްމިއްޔާތު ވަނީ ފަސްކޮށްފައެވެ.

ހަމަޖެހިފައިވާ ތާވަލާ އެއްގޮތަށް، ޖުލައި 4 އިން ފެށިގެން ތިން ދުވަހުގެ މުއްދަތަށް ތެހެރާނުގައި ޖަނާޒާގެ ރަސްމިއްޔާތުތައް ކުރިއަށްދާނެއެވެ. އަދި އޭގެ ފަހުން ޖުލައި 7 ވަނަ ދުވަހު ގުމްގައިވެސް ހާއްސަ ރަސްމިއްޔާތެއް ބޭއްވުމަށް ވަނީ ނިންމާފައެވެ.

އަލީ ޚާމަނައީ އީރާނުގެ ރޫހާނީ ލީޑަރުކަމާ ހަވާލުވެވަޑައިގަތީ 1989 ވަނަ އަހަރު، އާޔަތުالله ރޫހުالله ޚުމައިނީ އަވަހާރަވުމާ ގުޅިގެންނެވެ. ޚުމައިނީއަކީ ޕަހްލަވީ ރަސްކަން ނިމުމަކަށް ގެނައި އިންގިލާބުގެ ފިކުރީ މޭސްތިރިޔާ ކަމަށްވާއިރު، ޚާމަނައީއަކީ އީރާނުގެ އަސްކަރީ އަދި ޕެރާމިލިޓަރީ ނިޒާމު ބައްޓަންކުރެއްވި ބޭފުޅާއެވެ.

ޚާމަނައީގެ ކާމިޔާބު ނާއިބު އަދި އޭނާގެ ދަރިކަލުން މުޖްތަބާ ޚާމަނައީ، އެމެރިކާ-އިޒްރޭލު ހަނގުރާމަ ފެށުނީއްސުރެ އާންމުންގެ ތެރެއަށް ފެނިފައެއް ނުވެއެވެ. ނަމަވެސް، މިދިޔަ އޭޕްރިލް 8 ވަނަ ދުވަހު ގާއިމުކުރި ހަނގުރާމަ ހުއްޓާލުމުގެ އެއްބަސްވުމަށްފަހު ދެ ގައުމުގެ ދެމެދުގައި ކުރިއަށްދާ މަޝްވަރާތަކުގައި މުޖްތަބާ އިސް ދައުރެއް އަދާކުރައްވަމުން ގެންދަވާ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ބުނެފައެވެ.