އާރަށުގެ މައްސަލައާ ގުޅޭގޮތުން ކުރީގެ ރައީސް އަބްދުﷲ ޔާމީނުގެ މައްޗަށް އުފުލާފައިވާ ދައުވާގެ އާ ހެކިތަކުގެ މައްސަލާގައި ގޮތެއް ނިންމުމަށް އަންނަ މަހުގެ އެއްވަނަ ދުވަހަށް ތާވަލްކޮށްފިއެވެ.

ސްޕްރީމް ކޯޓުން މި މައްސަލާގައި ގޮތެއް ނިންމުމަށް ތާވަލްކޮށްފައިވަނީ އަންނަ ޖުލައިމަހުގެ އެއްވަނަ ދުވަހުގެ 9 ޖަހާއިރުއެވެ. އާރަށް ކުއްޔަށްދިން މައްސަލާގައި ރައީސް ޔާމީނުގެ މައްޗަށް ވަނީ ދަށު ކޯޓުން 11 އަހަރުގެ ޖަލުހުކުމެއް އިއްވާފައެވެ. އެހެން ނަމަވެސް މި މައްސަލާގައި ހައިކޯޓުން ވަނީ ޖަލު ހުކުމް ބާތިލްކޮށް މައްސަލަ އަލުން ބެލުމަށް ނިންމާފައެވެ.

 ހައިކޯޓުގެ ނިންމުމުގައި މައިގަނޑު 3 ކަމެއް ވަނީ އަންގާފައެވެ.

އެއީ؛

1) ޝަރީއަތުގެ ކުރީގެ ހުށަހެޅުންތަކަށް އަލުން ފުރުސަތުދީ އެކަމަށް ގޮތް ނިންމުން

2) ދައުލަތުގެ އައު ހެކިތައް އެއްފަރާތް ކުރުން

3) ދަށު ކޯޓުގެ ރިޕޯޓުގެ 68 ވަނަ ނުކުތާގައި ނެރެފައިވާ ދޭހަ އެއްފަރާތްކޮށް، އަލުން ކްރިމިނަލް ކޯޓުން މައްސަލައިގެ ގޮތެއް ކަނޑައެޅުން

ހައިކޯޓުގެ ހުކުމުގައި ދައުލަތުގެ އައު ހެކިތައް އެއް ފަރާތް ކުރުމަށް އަންގާފައިވާ އެންގުން ބާތިލް ކުރަން ދައުލަތުން ވަނީ ސްޕްރީމް ކޯޓުގައި އިސްތިއުނާފު ކޮށްފައެވެ. 

ސްޕްރީމް ކޯޓުގައި މިހާރު އޮތް މި މައްސަލާގައި މީގެކުރިން އެ ކޯޓުގައި ވާހަކަދައްކަވަމުން ދައުލަތުން ބުނެފައިވަނީ، އައު ހެކިތަކެއް ހުށަހަޅާފައިވަނީ، ދިފާއުން ހުށަހެޅި ހެކިވެރިން ދޮގު ހަދައި، އެ ފަރާތްތައް ދެއްކެވި ވާހަކަ ތަކުގައި ސުވާލު އުފެދޭ ކަންކަން ހުރުމުން ކަމަށެވެ.