ގަތަރުގެ އެންމެ ބޮޑު ގޭސް ފެސިލިޓީ ކަމަށްވާ ރަސް ލައްފާން އިންޑަސްޓްރިއަލް ޒޯނުގައި އެއްޗެއް ގޮވައި މަދުވެގެން 13 މީހުން މަރުވެ، 66 މީހުން ޒަޚަމްވެއްޖެއެވެ.

އާދީއްތަ ދުވަހުގެ ރޭ ހިނގި މި ހާދިސާއަކީ "ޓެކްނިކަލް އެކްސިޑެންޓެއް" ކަމަށް ގަތަރުގެ ދާޚިލީ ވުޒާރާއިން ވަނީ ބުނެފައެވެ. މި ގޮވުމުގެ ބާރުގަދަކަމުން މުޅި ސަރަހައްދުގެ އުޑުމަތި އޮރެންޖު ކުލައަށް ބަދަލުވެގެން ދިޔައިރު، މި ލޮޅުން 70 ކިލޯމީޓަރު (43 މޭލު) ދުރުގައި އޮންނަ ވެރިރަށް ދޯހާގެ މެދުތެރެއާ ހަމައަށް އިހުސާސް ކުރެވިފައިވެއެވެ. މި ހާދިސާގެ ސަބަބުން ގިނަ ބަޔަކު ވަނީ ބިރުގަނެ، ކަންބޮޑުވުން ފާޅުކޮށްފައެވެ.

ގަތަރުގެ އެނާޖީ މިނިސްޓަރު ސާދު ޝެރިދާ އަލް-ކާބީ ވިދާޅުވީ، މިއީ ގަސްތުގައި ބަޔަކު ދިން ހަމަލާއެއް ނޫން ކަމަށާއި، މި ހާދިސާގެ ސަބަބުން ގައުމުން ބޭރަށް ގޭސް އެކްސްޕޯޓު ކުރުމަށް އެއްވެސް ބުރޫއެއް ނާރާނެ ކަމަށެވެ. އަދި ތިމާވެށީގެ ގޮތުން ކުރިމަތިވެދާނެ ނުރައްކަލެއް ނެތް ކަމަށްވެސް އޭނާ ވިދާޅުވިއެވެ. ނަމަވެސް، މި ހާދިސާ ހިނގި ބާރްޒާން ލޯކަލް ގޭސް ސަޕްލައި ފެސިލިޓީގެ އޮޕަރޭޝަންތައް އަލުން ފެށޭނެ ދުވަހެއް ބުނަން އަދި ދަތި ކަމަށް މިނިސްޓަރު ފާހަގަކުރެއްވިއެވެ.

މި ހާދިސާގައި މަރުވި އެންމެންނަކީ އިންޑިއާ އަދި ޕާކިސްތާނަށް ނިސްބަތްވާ މީހުންނެވެ. އިންޑިއާ އެމްބަސީން ވަނީ މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ފޮނުވައި، ޒަޚަމްވި މީހުންނަށް އެހީތެރިކަން ފޯރުކޮށްދިނުމަށް ގަތަރުގެ ކަމާބެހޭ ފަރާތްތަކާ ގުޅިގެން މަސައްކަތް ކުރަމުންދާ ކަމަށް ބުނެފައެވެ.

ދުނިޔޭގެ އެންމެ ބޮޑު އެލް.އެން.ޖީ އެކްސްޕޯޓް ފެސިލިޓީ ހިމެނޭ ރަސް ލައްފާން ބަނދަރަކީ މީގެ ކުރިން، އެމެރިކާއާއި އިސްރާއީލުން އީރާނާ ދެކޮޅަށް ކުރި ހަނގުރާމައިގެ ތެރޭގައި އީރާނުން ދިން ބަދަލުހިފުމުގެ ހަމަލާތަކުގައި ބޮޑެތި ގެއްލުންތަކެއް ލިބިފައިވާ ތަނެކެވެ. އެ ދުވަސްވަރު ގަތަރުން ވަނީ ދުނިޔޭގެ އެލް.އެން.ޖީ ސަޕްލައިގެ ފަސްބައިކުޅަ އެއްބައި ހުއްޓާލާފައެވެ.

ގަތަރު އެނާޖީން ބުނި ގޮތުގައި، މިފަހަރު ހިނގި ގޮވުމާ ގުޅިގެން ކުރަންޖެހޭ މަރާމާތުތަކުގެ ސަބަބުން، ކުރިއަށް އޮތް 3 އަހަރާއި 5 އަހަރާ ދެމެދުގެ މުއްދަތަކަށް ގޭސް އުފައްދާ މިންވަރު 12.8 މިލިއަން ޓަނަށް ދަށްވާނެއެވެ. މި ހާދިސާ ހިނގާފައިވަނީ މަރާމާތަށްޓަކައި 2025 ވަނަ އަހަރުގެ ޑިސެމްބަރު މަހުން ފެށިގެން ބަންދުކޮށްފައި އޮތް ފެސިލިޓީ، އަލުން ހުޅުވިތާ ދެ ދުވަސް ފަހުންނެވެ.

ކަމާބެހޭ ފަރާތްތަކުން މިހާރު ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.