މޯލްޑިވްސް ހައްޖު ކޯޕަރޭޝަންގެ ލިމިޓެޑްގެ މެނޭޖިންގ ޑިރެކްޓަރުގެ މަޤާމުންނާއި، ޑިރެކްޓަރުންގެ ބޯޑުގެ މެމްބަރުކަމުގެ މަގާމުން، ދަފްތަރު ނަންބަރު ރސ 13449، މުހައްމަދު ޝަކީލު އިސްތިއުފާ ދެއްވުމަށް ހުށަހަޅުއްވާފައިވާތީވެ، އިސްތިއުފާ ގަބޫލުކޮށް އެ މަގާމުން އޭނާ ވަކިކޮށްފައިވާ ކަމަށް ޕީސީބީން ބުނެފި އެވެ.
އިލެކްޝަންސް ކޮމިޝަން (އީސީ) ގެ މެންބަރު ކަމަށް ޝަކީލް އައްޔަނު ކުރަން ރައްޔިތުންގެ މަޖިލީހުން މިއަދު ވަނީ ފާސްކޮށްފަ އެވެ. ޝަކީލް އިސްތިއުފާ ދެއްވީ އީސީގެ މެންބަރު ކަމަށް ވަޑައިގަތުމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އީސީގެ މެންބަރު ކަމަށް ޝަކީލް އައްޔަނު ކުރުމަށް ފެންނަ ކަމަށް 51 މެންބަރުން ވޯޓުދީފައިވެއެވެ. ޝަކީލް މަގާމަށް އައްޔަނު ކުރުމާ ދެކޮޅަށް ވޯޓުދެއްވީ 7 މެންބަރުންނެވެ.
އީސީގެ މެންބަރު ކަމުގެ މަގާމު ހުސްވީ އެ ކޮމިޝަނުގެ މެންބަރު ކަމުންނާއި އީސީގެ ރައީސް ކަމުގެ މަގާމުން ޒާހިދު އިސްތިއުފާ ދެއްވުމުންނެވެ. އެއާއެކު މެމްބަރު ކަމަށް ކުރިމަތިލުމުގެ ފުރުސަތު ހުޅުވާލާފައިވާއިރު، ކުރިމަތިލީ ފަރާތްތަކުގެ ތެރެއިން ރައީސް ޑރ. މުޙައްމަދު މުޢިއްޒު އިސްކަންދެއްވީ ޝަކީލް އަށެވެ.
މި މައްސަލަ ދިރާސާ ކޮށް، ޝަކީލްއާ އިންޓަވިއު ކުރުމަށް އިއްޔެ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ ބައްދަލުވުމެއް ވަނީ ބާއްވާފައެވެ. އެއަށްފަހު ކޮމިޓީން ނިންމީ ޝަކީލް މަގާމަށް އައްޔަނު ކުރުމަށް ފެންނަ ކަމަށެވެ.
ޝަކީލް މީގެކުރިންވެސް ވަނީ އިލެކްޝަންސް ކޮމިޝަނުގެ މެންބަރުކަމުގެ މަޤާމު އަދާކުރައްވާފަ އެވެ.
Advertisement
This content is created and paid for by advertisers and does not involve Voice Journalists
