ރާއްޖެއަށް ޒިޔާރަތްކޮށްގެން އުޅޭ ވަރލްޑް ބޭންކްގެ ޓީމް، ފިނޭންސް މިނިސްޓަރު ހަސަން ޒަރީރާ މިއަދު ބައްދަލުކުރައްވައިފިއެވެ.
މިކަމާ ގުޅޭގޮތުން ފިނޭންސް މިނިސްޓްރީން މިއަދު ބުނީ މިބައްދަުވުމުގައި މައިގަނޑު ގޮތެއްގައި މަޝްވަރާ ކުރެވުނީ، ރާއްޖެ އާއި ވޯލްޑް ބޭންކާ ދެމެދު ޒަމާނުއްސުރެ އޮންނަ ގުޅުން އިތުރަށް ބަދަހިކުރެއްވުމާ ގުޅޭ ގޮތުންނެވެ. އެ ގޮތުން ދެ ފަރާތަށް ފައިދާހުރި ތަރައްޤީގެ މަޝްރޫޢުތައް ކުރިއެރުވުމާއި ތަރައްޤީގެ ފައިނޭންސިން ފުރުޞަތުތައް ފުޅާކުރުމާއި ޕްރައިވެޓް ސެކްޓާ ކުރިއެރުވުމާއި އިޤުތިޞާދީ ގުޅުންތައް ވަރުގަދަކުރުން ހިމެނެއެވެ.
މީގެ އިތުރުން ރާއްޖޭގެ ޤައުމީ ތަރައްޤީގެ އަމާޒުތަކާ ގުޅޭ ބޮޑެތި މަޝްރޫޢުތައް ތަންފީޒުކުރުން އަވަސްކުރުމާ ގުޅޭ ގޮތުންވެސް މަޝްވަރާ ކުރެވުނުކަމަށް ފިނޭންސުން ބުންޏެވެ. މި ބައްދަލުވުމުގައި މިނިސްޓަރު ޒަރީރު ވަނީ ރާއްޖޭގެ ތަރައްޤީގެ ދަތުރުގައި ވޯލްޑް ބޭންކުން ދެމުން ގެންދާ އެހީތެރިކަމާއި އެއްބާރުލުމަށް ޝުކުރު އަދާކުރައްވައިފައެވެ
މި ބައްދަލުވުމުގައި ވޯލްޑް ބޭންކުގެ ވަފުދުގައި އިސްކޮށް ހުންނެވީ ރާއްޖެ ނޭޕާލް އަދި ސްރީލަންކާ ޑިވިޝަން ޑައިރެކްޓަރު ޑޭވިޑް ސިސްލެން އާއި ރާއްޖެ އަދި ސްރީލަންކާގެ ކަންޓްރީ މެނޭޖަރު ގެވޯގް ސާގްސިޔާން އެވެ. މި ބައްދަލުވުމުގައި ފިނޭންސް މިނިސްޓްރީގެ އިސް ބޭފުޅުން ވެސް ބައިވެރިވެވަޑައިގެންނެވިއެވެ.
Advertisement
This content is created and paid for by advertisers and does not involve Voice Journalists
