ހދ. ހިރިމަރަދޫ ރައްޔިތުންގެ ތެރެއިން ހއ. ހޯރަފުއްޓަށް ބަދަލުވާން ބޭނުންވާ ފަރާތްތަކަށް އެ ފުރުޞަތު ހުޅުވާލައި، ނަން ނޯޓުކުރުމަށް ހަނިމާދޫ ކައުންސިލުން އިޢުލާންކޮށްފިއެވެ.

ހަނިމާދޫ ކައުންސިލުން ނެރުނު އިޢުލާނެއްގައި ބުނެފައިވަނީ، ހއ. ހޯރަފުށީ ކައުންސިލުން މާރިޗު 27 ގައި ބޭއްވި އެ ކައުންސިލްގެ އާންމު ޖަލްސާގައި، ހިރިމަރަދޫ ރައްޔިތުންގެ ތެރެއިން ހޯރަފުއްޓަށް ބަދަލުވާން އެދޭ ފަރާތްތަކަށް ރަސްމީކޮށް ދައުވަތު ދިނުމަށް ނިންމާފައިވާ ކަމަށެވެ.

އަދި އެ ނިންމުމާ ގުޅިގެން، ހޯރަފުށީ ކައުންސިލުން މިކަމަށް އެދި ރަސްމީ ސިޓީއަކުން ހުށަހަޅާފައިވާ ކަމަށްވެސް އެ އިޢުލާނުގައި ފާހަގަކޮށްފައިވެއެވެ.

މި ފުރުޞަތުގެ ދަށުން، ހިރިމަރަދޫ ރައްޔިތުންގެ ތެރެއިން ހޯރަފުއްޓަށް ބަދަލުވާން އެދޭ ފަރާތްތަކުން އިއްޔެއިން ފެށިގެން 30 ދުވަހުގެ ތެރޭގައި ނަން ނޯޓުކުރަން ޖެހޭނެއެވެ. ނަން ނޯޓުކުރުމުގެ އިންތިޒާމު ހަމަޖައްސާފައިވަނީ ހަނިމާދޫ އަވަށު އޮފީސް ކުރީގެ ހިރިމަރަދޫ ކައުންސިލްގެ އިދާރާ ނުވަތަ ހަނިމާދޫ ކައުންސިލްގެ އިދާރާ މެދުވެރިކޮށެވެ.

މީގެ އިތުރުން، ކައުންސިލްގެ އީމެއިލް [email protected] މެދުވެރިކޮށް ލިޔުމަކުން ނުވަތަ 4002064 ނަންބަރު ފޯނާ ގުޅައިގެންވެސް ނަން ނޯޓުކުރެވޭނެ ކަމަށް ހަނިމާދޫ ކައުންސިލުން މަޢުލޫމާތު ދެއެވެ.