ލޭ ހަދިޔާ ކުރުމަށް ހޭލުންތެރިކުރަން "ލޭ އެޕް"އިން އިސްނަގައިގެން ނެރޭ ”ލޭގެ ޞަދަޤާތް“ ލަވަ ރިލީސްކޮށްފިއެވެ.

މި ލަވަ ރިލީސްކޮށްފައިވަނީ މިއަދު ”ހޭޔަންބޯ“ ޕްރޮގްރާމްގެ ތެރެއިންނެވެ. މިއީ މިއީ ލޭ އެޕް އިން އިސްނަގައިގެން އެހީ ޖަމިއްޔާއާއި ގުޅިގެން ނެރޭ"އިސްލާމިކް ރިދަމް"ގެ އުފެއްދުމެކެވެ. މި ލަވައިގެ މީޑިއާ ޕާޓްނަރަކީ 'ވޮއިސް' އެވެ.

ލަވަ ފެށިގެން އަންނަނީ ބައްޕައަކުއޭނާގެ ބަލި ދަރިފުޅު ކައިރީގައި އިށީދެލައިގެން އިންނަ މަންޒަރުންނެވެ. ދަރިފުޅުގެ ހާލު ދެރަވެ، އެޑްމިޓްކޮށްފައި އޮތްއިރު، ވަނީ އިންތިހާއަށް ލޭ ބޭނުންވެފައެވެ.

ދަރިފުޅަށް ބޭނުންވާ އޭ ނެގެޓިވް ލޭ ހޯދުމަށް ކުއްޖާގެ ބައްޕަ އެކި ވައިބާ ގުރޫޕްތަކަށް މެސެޖުކޮށް މަސައްކަތްކުރެއެވެ. ނަމަވެސް ލޭ ލިބޭގޮތެއް ނުވެއެވެ.

އެކަމާ ކަންބޮޑުވެ، މާޔޫސްކަމާއި މޮޅިވެރިކަމާއެކު ހުއްޓައި ފެންނަނީ ލޭ ހޯދުމަށް އެހީވެދޭ ”ލޭ އެޕް“ އެވެ. އެ އެޕްލިކޭޝަން ޑައުންލޯޑްކޮށް، ލޭ ހޯދުމަށް އެދުނުތާ މާ ގިނައިރުތަކެއް ނުވެ ލޭ ހަދިޔާކުރާނެ މީހަކު ލިބެއެވެ. އަދި އޭނާ ހަދިޔާކުރާ ލެއިން ދަރިފުޅުގެ ޙާލު ރަނގަޅުވާން ފަށައެވެ.

ލަވައިގައި ބައްޕަގެ ރޯލު އަދާކޮށްފައިވަނީ ދިލްޝާން (ދިލް)އެވެ. ދަރިފުޅުގެ ބައި އައިނީ ކުޅެދީފައިވާއިރު، ލޭ ހަދިޔާ ކުރަން އަންނަ މީހާ އަކީ ޢުމަރު (ޓީޑީސީ އުމަރު) އެވެ.

ލަވައިގެ އެކްޓަރުން އެމީހުންގެ މަސައްކަތް ފުރިހަމައަށް އަދާކޮށްފައިވާއިރު، އިތުރަށް ކުރިއަށް ދިޔުމުގެ ކުރީން ލަވައިގެ ޅެމަށް ބަލާލަން ޖެހެއެވެ. ލޭ ބޭނުންވެ، އެ ނުލިބިއްޖެ ނަމަ، ފުރާނައަށް ވާނެ ނުރައްކާއާއި، އެ ހަދިޔާ ކުރުމުން ތަކުލީފް އުފުލަމުންދާ މީހާއަށް ލިބިދޭ ލުއި ބުނެދީފައިވެއެވެ. އަދި، އެއީ ބަލިމީހާގެ، ކަރުނަ އަޅަމުންދާ ޢާއިލާގެ މޫނަށް އުފާވެރިކަން ގެނެސްދޭ ބޮޑުވެގެންވާ ޞަދަޤާތެއްކަން ފާހަގަކޮށްފައިވާއިރު ލޭ ހަދިޔާ ކުރުމުގެ މުހިންމުކަން ޅެމުން ބުނެދީފައިވަނީ ތިލަ އަދި އެހާމެ ފަށުވި އިބާރާތުންނެވެ. މި ފުރިހަމަ ޅެން ހަދައިދީފައިވަނީ އީސާ ޝަރީފެވެ.

މީގެ އިތުރުން، ޝިފާއުގެ އަޑުން ލަވައިގެ ޅެމާއި ރާގަށް ފުރިހަމައަށް އިންސާފުކޮށްދީފައިވާއިރު، އެއަށް އިތުރު ރީތި ކަމެއް ގެނެސްދީފައިވަނީ ހުސައިން ތަޢުފީޤުގެ އޯޑިއޯ ރިކޯޑިންގ އިންނެވެ.

ހަމަ އެހެންމެ ”އޯކޭޒް އިންކް“ ގެ ޓީމުން ލަވައިގެ ވީޑިއޯ ގެނެސްދީފައިވާ ގޮތުން ލަވައަށް އިތުރު ފުރިހަމަކަމެއް ގެނެސްދެއެވެ.

ލޭ ނުލިބުމުގެ މައްސަލައަކީ ރާއްޖޭގައި ވަރަށް ބޮޑު މައްސަލައެކެވެ. އެގޮތުން ތެލެސީމިއާ ހުންނަ ފަރާތްތަކާއި، އެނޫންވެސް އެހެނިހެން ޙާލަތްތައް މެދުވެރިވެ، ލޭ ބޭނުންވާ ދަނޑިވަޅުތަކުގައި ވަރަށް ގިނަ މީހުންގެ ހުންނަ ލޭގެ ގުރޫޕްތަކުގެ ލޭވެސް ހޯދަން ބުރަ މަސައްކަތްތަކެއް ކުރަންޖެހެއެވެ. އަމިއްލައަށް އިސް ނަގައިގެން ގަވާއިދުން ބްލަޑް ބޭންކަށް ލޭ ހަދިޔާ ކުރާ މީހުން އަދިވެސް މަދެވެ.

އެހެންކަމުން، މިއީ އެކަމަށް ހިތްވަރުދީ، ލޭ ހަދިޔާ ކުރުމަށް ބާރު އެޅުމުގެ މަޤުސަދުގައި ނެރޭ ލަވައެއް ކަމުގައި ލަވަ އުފައްދާފައިވާ ފަރާތުން ބުނެއެވެ.

އިސްލާމިކް ރިދަމް އަކީ މީގެ ކުރިންވެސް އާންމުންގެ ބޮޑު މަގުބޫލުކަމެއް ހޯދާފައިވާ ތަފާތު ލަވަތަކެއް ނެރެފައިވާ ބައެކެވެ. އެގޮތުން "ރޮއްވާފަ ލޯތައް" ލަވައަކީ ގިނަ ބައެއްގެ ހިތްތަކާ ކުޅެލި، އެންމެ ފާހަގަކޮށްލެވޭ އެއް މަސައްކަތެވެ. މީގެ އިތުރުން "އުޖާލާވެ އުދަރެސް"، "އޮއްސުމުން" އަދި "ކަރުނަ" ފަދަ ލަވަތަކަކީވެސް މަގުބޫލު އުފެއްދުން ތަކެކެވެ.