މިދިޔަ ދެ އަހަރާ ބައިގެ ތެރޭގައި މޯލްޑިވްސް ކަސްޓަމްސް ސާވިސް އިން ވަނީ 324 ކިލޯގެ ޑްރަގް އަތުލައިގެންފައި ކަމަށް ތަފާސް ހިސާބުތަކުން ދައްކައިފި އެވެ.

މޯލްޑިވްސް ކަސްޓަމްސް އިން ވަނީ ރާއްޖެއަށް އެތެރެކުރަން އުޅެނިކޮށް އެ އިދާރާއިން ހިފަހައްޓާފައިވާ މަސްތުވާތަކެތީގެ ތަފާސް ހިސާބުތައް އާންމުކޮށްފަ އެވެ. އެގޮތުން ޖަނަވަރީ 2024 އިން ޖޫން 2026 އަށް މަސްތުވާތަކެތީގެ މައްސަލައިގެ އަދަދު 27 އިންސައްތަ އިތުރުވެފައިވާ ކަމަށް ހިސާބުތަކުން ފެނެ އެވެ.

އަދި އަތުލައިގަނެވުނު މަސްތުވާތަކެތީގެ އަދަދު ކުރީ ދައުރުގެ ދެ އަހަރާއި ބަޔަށް ވުރެ 31 އިންސައްތަ އިތުރެވެ.

ދެ ދައުރުގެ ދެ އަހަރާއި ބައިގެ ތަފާސް ހިސާބު --

ކަސްޓަމްސްގެ ތަފާސް ހިސާބުތައް ދައްކާގޮތުން 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް އަތުލައިގަނެވުނީ 247 ކިލޯގެ މަސްތުވާތަކެއްޗެވެ. އެއީ 116 މައްސަލައެއްގަ އެވެ.

ނަމަވެސް 2024 ވަނަ އަހަރުން ފެށިގެން 2026 ވަނަ އަހަރުގެ ނިޔަލަށް 324 ކިލޯގެ މަސްތުވާތަކެތި ވަނީ އަތުލައިގެންފަ އެވެ. އެއީ 147 މައްސަލައެއްގައި ހިމެނޭ ތަކެއްޗެވެ.

ތަފާސް ހިސާބުތައް ދައްކާ ގޮތުން 2019 އިން 2023 (5 އަހަރު) އަށް އަތުލެވުނު މަސްތުވާތަކެއްޗާ އަޅާބަލާއިރު، މިދިޔަ ދެ އަހަރާއި ބައިގެ މުއްދަތުގަައި އަތުލެވުނު މަސްތުވާތަކެތީގެ މިންވަރު އިތުރެވެ.