މިއަހަރުގެ ވޯލްޑް ކަޕް ފުޓުބޯޅަ މުބާރާތް އެމެރިކާގެ ޤައުމީ ޓީމުން ކާމިޔާބުކޮށްފިނަމަ، ހަނދަށް ފުޓުބޯޅައެއް ފޮނުވާނެ ކަމަށް އެމެރިކާގެ ފަޒާގެ އިދާރާ (ނާސާ) އިން ވަޢުދުވެއްޖެއެވެ.
ނާސާގެ އިސްވެރިޔާ ޖެރެޑް އައިސެކްމަން މިކަން އިޢުލާން ކުރެއްވީ މިދިޔަ އަންގާރަ ދުވަހު، ހަނދުގައި ބޭހެއް އެޅުމަށް އެ އިދާރާއިން ކުރިއަށްގެންދާ މަޝްރޫޢުތަކުގެ ތަފްސީލު ހާމަކުރުމަށް ބޭއްވި އިވެންޓެއްގައެވެ. އައިސެކްމަން ވިދާޅުވީ މިއީ އެމެރިކާގެ ޓީމަށް ދެވޭ ބޮޑު ޗެލެންޖެއް ކަމަށާއި، ޓީމުން އެ މަސައްކަތް ފުރިހަމަކޮށް ތަށި ހޯދާނެ ކަމަށް އުންމީދު ކުރައްވާ ކަމަށެވެ.
2026 ވަނަ އަހަރު އެމެރިކާ، މެކްސިކޯ އަދި ކެނެޑާ ގުޅިގެން ބާއްވާ ވޯލްޑް ކަޕަށް ތައްޔާރުވުމުގެ ގޮތުން، ނާސާއިން މިހާރުވެސް ވަނީ ބައިނަލްއަޤްވާމީ ފަޒާގެ މަރުކަޒަށް ފީފާ ބޯޅައެއް ފޮނުވާފައެވެ. ނަމަވެސް، އެމެރިކާއިން މުބާރާތް ކާމިޔާބުކޮށްފިނަމަ، މީގެ ކުރިން ފުޓުބޯޅައެއް ނުފޮނުވާހާ ދުރަށް، އެބޯޅަ ހަނދަށް ފޮނުވާލާނެ ކަމަށް އައިސެކްމަން ވިދާޅުވިއެވެ.
މިކަމާ ގުޅޭގޮތުން ވާހަކަ ދައްކަވަމުން އޭނާ ވަނީ 1971 ވަނަ އަހަރުގެ ތާރީޚީ ހާދިސާއަކަށް އަލިއަޅުވާލާފައެވެ. އެގޮތުން އޭނާ ބުނިގޮތުގައި އެ އަހަރު އެސްޓްރޮނޯޓް އެލަން ޝެޕަރޑް ވަނީ ހަނދަށް ގޮލްފް ކްލަބަކާއި ދެ ބޯޅަ ގެންގޮސް، ހަނދުގައި ގޮލްފް ކުޅެފައެވެ.
"އަހަރެމެން މި އުޅެނީ އެލަން ޝެޕަރޑަށްވުރެ ކުރިއަށްދާން. އަހަރެމެން ހަނދަށް ފުޓުބޯޅައެއް ފޮނުވާނަން،" އެމެރިކާ ޓީމަށް ހިތްވަރު ދެމުން އައިސެކްމަން ބުންޏެވެ.
ނާސާގެ މޫން ބޭސް މަޝްރޫޢުގެ ޕްރޮގްރާމް މެނޭޖަރު ކާލޯސް ގާސިއާ-ގަލާން ވިދާޅުވީ، އެމެރިކާ މޮޅުވެއްޖެނަމަ، ސައިންޓިފިކް ސާމާނުތަކާއެކު ހަނދަށްދާ އުޅަނދުން ބޯޅައަށް ޖާގަ ހޯދައިދޭނެ ކަމަށެވެ. އަދި ފުޓުބޯޅައަކީ ލުއި އެއްޗަކަށް ވުމުން، އެ އުފުލުމަކީ ދަތި ކަމަކަށް ނުވާނެ ކަމަށްވެސް އޭނާ ފާހަގަކުރެއްވިއެވެ.
"މިހާރު ހުރިހާ ކަމެއް އޮތީ އެމެރިކާގެ ފިރިހެން ޤައުމީ ޓީމުގެ އަތްމަތީގައި. އެމީހުންނަށް ކާމިޔާބަށް އެދެން،" ގާސިއާ-ގަލާން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
