މި ދުވަސްވަރު 8،000އެއްހާ ދަރިވަރުން ސުކޫލަށް ނުދާކަން ފާހަގަކުރައްވާ ތަޢުލީމާ ބެހޭ ވަޒީރު ޑރ. އިސްމާއީލް ޝަފީޢު ކަންބޮޑުވުން ފާޅުކުރައްވައިފި އެވެ. 

ވަޒީރު މިހެން ވިދާޅުވީ ނެޝަނަލް އެސެސްމަންޓް އޮފް ލާނިން އައުޓްކަމްސް ރިޕޯޓް އާންމުކުރުމަށް މިއަދު ބޭއްވި ހަފްލާގައި ވާހަކަ ދައްކަވަމުންނެވެ. ވަޒީރު ވިދާޅުވީ ތައުލީމީ ދާއިރާގައި ކަންބޮޑުވުން ހުރި ބައެއް ކަންކަން އެބަހުރި ކަމަށާ ނަމަވެސް ބައެއް ވާހަކަތައް ނުދެކެވޭ "ސިއްރު" ވާހަކަތަކެއްގެ ގޮތުގައި އޮންނަ ކަމަށެވެ.

އެއީ ދައްކަން ޖެހޭ ވާހަކަތައް ކަމުގައި ފާހަގަކުރައްވާ ވަޒީރު ވިދާޅުވީ ދަރިވަރުންގެ ނަތީޖާ އެކަށީގެންވާ މިންވަރެއްގައި ހިފެހެއްޓުމުގައި ދަރިވަރުން ސުކޫލަށް ހާޒިރުވެ އުނގެނޭ މިންވަރު ވެސް ރަނގަޅު މިންގަނޑެއްގައި ހިފެހެއްޓެން ޖެހޭ ކަމަށެވެ.

"އަޅުގަނޑުމެންގެ ދަރިވަރުން އެކަށީގެންވާ މިންވަރަށް ސުކޫލަށް ހާޒިރެއް ނުވެ, ފިލާވަޅުތައް ގެއްލޭ ކަމުގައިވާނަމަ އެ ދަރިވަރުންގެ ނަތީޖާއަށް އެއިން އަސަރު ކުރާނެ," ވަޒީރު ވިދާޅުވި އެވެ.

ވަޒީރު ވިދާޅުވީ ކުރީން އެކަން އޮންނަނީ ވަކި މުއްދަތަކަށް ދަރިވަރު ސުކޫލަށް ހާޒިރުނުވާނަމަ އެކަން އެޑިއުކޭޝަން މިނިސްޓްރީއަށް އެންގުން ކަމަށާ ނަމަވެސް މި ނިމުނު ޖޫން މަހުގެ 21 ވަނަ ދުވަހުން ފެށިގެން ސުކޫލަށް ހާޒިރުވާ ދަރިވަރުންނާ ހާޒިރުނުވާ ދަރިވަރުން ކޮންމެ ދުވަހަކު ބަލަމުން ގެންދާ ކަމަށެވެ.

އެގޮތަށް ބެލުމުން މި ދުވަސްވަރު ފެންނަނީ ކަންބޮޑުވާން ޖެހޭފަދަ ހިތާމަވެރި މަންޒަރެއް ކަމަށް ވަޒީރު ވިދާޅުވި އެވެ.

"އަޅުގަނޑަށް އެނގޭ މިއީ ވޯލްޑްކަޕް ދުވަސްވަރުކަން. އެހެން ނަމަވެސް އެކަށެއްކަހާސް ދަރިވަރުން ސުކޫލަށް ނުދިއުމަކީ އަޅުގަނޑުމެން ކަންބޮޑުވާ ކަމެއް. އެކަން ހައްލުވާން ޖެހޭ,"`

ވަޒީރު ވިދާޅުވީ މީގެތެރެއިން ސާޅީހަކަށް އިންސައްތަ ދަރިވަރުން ނިސްބަތް ވަނީ މާލެ ސަރަހައްދަށް ކަމަށެވެ.