އީރާނުގެ ކުރީގެ ރޫޙާނީ ލީޑަރު އާޔަތުالله އަލީ ޚާމަނާއީގެ ޖަނާޒާގެ ރަސްމިއްޔާތުތައް މިމަހުގެ 4 ވަނަ ދުވަހު ފެށުމަށް ހަމަޖެހިފައިވާއިރު، ސަލާމަތީ ނުރައްކާތަކެއް ހުރުމުގެ ސަބަބުން އޭނާގެ ދަރިކަލުން މުޖުތަބާ ޚާމަނާއީ މި ރަސްމިއްޔާތުތަކުގައި ބައިވެރިވެވަޑައިނުގަންނަވާނެކަން ހާމަވެއްޖެއެވެ.

އިންޑިއާގައި ހުންނަވާ އާޔަތުالله ޚާމަނާއީގެ މަންދޫބު، އާޔަތުالله ޙަކީމް އިލާހީއާ ހަވާލާދީ "އޭއެންއައި" ނިއުސް އޭޖެންސީން ރިޕޯޓްކޮށްފައިވާ ގޮތުގައި، އިސްރާއީލުން ދެމުންދާ އިންޒާރުތަކާއި ފާރަލުންތަކުގެ ސަބަބުން، މުޖުތަބާ ޚާމަނާއީ އާންމުންގެ ތެރެއަށް ނުކުމެވަޑައިގަތުމަކީ ނުރައްކާތެރި ކަމެކެވެ.

36 އަހަރު ވަންދެން އީރާނުގެ އެންމެ މަތީ ލީޑަރުގެ މަޤާމުގައި ހުންނެވި އަލީ ޚާމަނާއީ އަވަހާރަވީ މިދިޔަ ފެބްރުއަރީ މަހުގެ 28 ވަނަ ދުވަހުއެވެ. އެއީ އެމެރިކާ އާއި އިސްރާއީލުން ގުޅިގެން އީރާނަށް ޙަމަލާދޭން ފެށި ދުވަހެވެ. މި ޙަމަލާތަކާއެކު މެދުއިރުމަތީގައި ބޮޑު ހަނގުރާމައެއް ވަނީ ފެށިފައެވެ.

ޖަނާޒާގެ ކަންކަން ރޭވިފައިވާ ގޮތުން، ރަސްމިއްޔާތުތައް ޖުލައި 4 ގައި ތެހެރާނުގައި ފެށޭނެއެވެ. އަދި ޖުލައި 7 ގައި ތެހެރާނުގެ ދެކުނުން އޮންނަ ރަށެއް ކަމަށްވާ ގުމްގައި ދީނީ ހަރަކާތްތަކެއް ކުރިއަށްދާނެއެވެ. 6 ދުވަހުގެ މި ރަސްމިއްޔާތުތައް ނިމުމަކަށް އަންނާނީ ޖުލައި 9 ވަނަ ދުވަހު، އީރާނުގެ އިރުއުތުރުގައިވާ މަޝްހަދުގައި އޭނާ ފަސްދާނުލުމުންނެވެ.

އީރާނުގެ އެކި ސަރަޙައްދުތަކުގައި މިހާރުވެސް ޚާމަނާއީގެ ބޮޑެތި ފޮޓޯތަކާއި ބިލްބޯޑުތައް ހަރުކުރެވިފައިވާ އިރު، މި 6 ދުވަހުގެ ތެރޭގައި އެތައް މިލިއަން މީހުން މަގުތަކަށް ނުކުންނާނެ ކަމަށް ލަފާކުރެވެއެވެ.

މި ޖަނާޒާގައި ބައިވެރިވުމަށް އީރާނުގެ ރައީސް މަސްޢޫދު ޕެޒެޝްކިއަން ވަނީ އިންޑިއާގެ ބޮޑުވަޒީރު ނަރެންދުރާ މޯދީއަށް ދަޢުވަތު އަރުވާފައެވެ. ނަމަވެސް މޯދީ މި ރަސްމިއްޔާތުގައި ބައިވެރިވެވަޑައިގަތުމަކީ ނާދިރު ކަމެއް ކަމަށް މަޢުލޫމާތު ލިބެއެވެ.

އިންޑިއާގެ ފަރާތުން މި ޖަނާޒާގައި ބައިވެރިވާނީ ބިހާރުގެ ގަވަރުނަރު ޖެނެރަލް ސައްޔިދު ޙަސްނައިން އާއި ސްޓޭޓް މިނިސްޓަރ ފޯ އެކްސްޓަރނަލް އެފެއާޒް ޕަވިތުރާ މާގަރީޓާއެވެ. މީގެ އިތުރުން ކޮންގްރެސް ޕާޓީގެ ފަރާތުން ކުރީގެ ޚާރިޖީ ވަޒީރު ސަލްމާން ޚުރުޝީދުވެސް ބައިވެރިވެވަޑައިގަންނަވާނެއެވެ.