މިފަހަރުގެ ވަރލްޑްކަޕްގައި އާދަޔާހިލާފް ރޫހެއްގައި ފެނިގެންދިޔަ ކޭޕް ވާޑް ބަލިކޮސް އާޖެންޓީނާއިން މުބާރާތުގެ ގަދަ 16 ޓީމްގެ ތެރެއަށް ދަތުރުކޮށްފިއެވެ.

ވާދަވެރި ކުޅުމެއް ފެނިގެންދިޔަ މިމެޗްގައި ކޭޕް ވާޑް ވަނީ އާޖެންޓީނާއާ ދެކޮޅަށް މޮޅު ކުޅުމެއް ދައްކައި ގޯލްތަކެއްވެސް ޖަހާފައެވެ. މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ އާޖެންޓީނާއެވެ. އެއީ 29 ވަނަ މިނެޓް ތެރޭގައި މާޓިނޭޒް ތަނަވަސްކޮށްދިން ފުރުސަތެއްގައި ލިއޮނެލް މެސީ ކާމިޔާބުކޮށްދިން ލަނޑުންނެވެ. މެޗްގެ ފުރަތަމަ ހާފް ނިމުނީ އާޖެންޓީނާ ކުރީގައި އޮވެގެންނެވެ.

ފުރަތަމަ ހާފްގައި އާޖެންޓީނާއިން ލީޑް ނަގާފައިވަނިކޮށް ކޭޕް ވާޑުން ވަނީ ދެވަނަ ހާފް ފެށިތާ މާ ގިނައިރެއްނުވެ މެޗް އެއްވަރުކޮށްފައެވެ. މި ލަނޑު ޖަހައިދިނީ ޑުއާޓޯ އެވެ. މެޗްގައި ދެން ހުރިހާ ލަނޑެއްވެސް ފެނިގެންގޮސްފައިވަނީ އިތުރުވަގުތުގެ ކުޅުމުގެ ތެރޭގައެވެެ. އާޖެންޓީނާގެ މާޓިނެޒް 92 ވަނަ މިނެޓްގެ ތެރޭގައި ލަނޑެއް ޖަހައި ކުރި ހޯދާފައިވަނިކޮށް ކޭޕް ވާޑްގެ ކަބްރާލް ވަނީ ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ. އާޖެންޓީނާ މޮޅުވީ މެޗުގެ 111 ވަނަ މިނެޓުގައި ކްރިސްޓިއަން ރޮމޭރޯ ބޮލުން ފޮނުވާލި ބޯޅަ، ޑިނޭ ބޯޖެސްގެ ގައިގައި ޖެހިފައި ގޯލަށް ވަނުމުންނެވެ.

ސްޕެއިނާ ދެކޮޅަށް ކޭޕް ވާޑްގެ ގޯލްކީޕަރު ވޮޒީނިއާ ދެއްކި މޮޅު ކުޅުމާއެކު އޭނާއަށް ގިނަ ބައެއްގެ ތައުރީފް ލިބުނުއިރު، އާޖެންޓީނާ މެޗްގައި ވޮޒީނިއާ ވަނީ މާ މޮޅު ކުޅުމެއް ދައްކާފައެވެ. އެގޮތުން އުމުރުން 40 އަހަރުގެ މި ކީޕަރު ވަނީ އާޖެންޓީނާގެ އަށް ހަމަލާއެއް ދިފާއުކޮށްފައެވެ. އޭގެ ތެރޭގައި މެސީ ފޮނުވާލި ހަމަލާތައް ފާހަގަކޮށްލެވެއެވެ. އޭނާ ވަނީ، މެސީ ފޮނުވާލި ނުރައްކާތެރި ހިލޭ ޖެހުމެއް ވަރަށް ހުށިޔާރުކަމާއެކު ދިފާއުކޮށްފައެވެ.

މެޗު ނިމުމުން، މާޓީނޭޒް އާއި މެސީ ފަދަ އާޖެންޓީނާގެ ކުޅުންތެރިން ވަނީ މާޔޫސްވެފައި ތިބި ކޭޕް ވާޑްގެ ކުޅުންތެރިންނަށް ގޮސް ހިތްވަރު ދީފައެވެ. ވަރލްޑްކަޕް ގަދަ 16 ގައި އާޖެންޓީނާ ބައްދަލުކުރާނީ މިސްރާ އެވެ.