ދުނިޔޭގެ ފުޓްބޯޅައިގެ ލެޖެންޑް ކްރިސްޓިއާނޯ ރޮނާލްޑޯއަކީ ހަމައެކަނި ދަނޑުމަތީގައި ރެކޯޑްތައް މުގުރާލާ ކުޅުންތެރިއެއް ނޫނެވެ. ދަނޑުބޭރުން އިންސާނިއްޔަތަށްޓަކައި އޭނާ ކޮށްދޭ ކަންކަމަކީވެސް ގިނަބައެއްގެ ސަމާލުކަން ލިބޭ ކަންކަމެވެ.
އެގޮތުން ވެނެޒުއޭލާގެ އުތުރަށް ދާދިފަހުން އައި ބާރުގަދަ ބިންހެލުމުގައި ހުރިހާ އެއްޗެއް ގެއްލި، ހާލުގައި ޖެހުނު އެންދްރޭސް ނަމަކަށް ކިޔާ ކުއްޖަކަށް އޭނާ ހިތްވަރުދީ ފޮނުވާފައިވާ ވީޑިއޯ މެސެޖު މިހާރު އަންނަނީ މީސްމީޑިއާގައި ވައިރަލްވެ ގިނަ ބައެއްގެ ސަމާލުކަން ހޯދާފައެވެ.
2026 ޖޫން 24 ވަނަ ދުވަހު ވެނެޒުއޭލާއަށް އައި ރިކްޓަރ މިންގަނޑުން 7.2 އަދި 7.5 ގެ ބާރުގަދަ ދެ ބިންހެލުމުގައި 1,400 އަށްވުރެ ގިނަ މީހުން މަރުވެ، އެތައް ބަޔަކު ވަނީ ގެއްލިފައެވެ. މި ހާދިސާގައި ކަރަކަސް އާއި ލަގުއައިރާގެ ބޮޑު ބައެއް ވަނީ ސުންނާފަތިވެފައެވެ.
އަދި މި ހާދިސާގައި އަންދްރޭސްގެ އާއިލާގެ މެންބަރުން މަރުވެ، އޭނާގެ އެއް ފައި ވަނީ ބުރިކޮށްލަން ޖެހިފައެވެ. ހޮސްޕިޓަލުގައި ފަރުވާ ހޯދަމުން ދިޔަ އެންދްރޭސް، ރޮނާލްޑޯގެ "ޓްރޭޑިންގ ކާޑެއް" ބޭނުންވެގެން އެދުމުން، ރޮނާލްޑޯ ވަނީ ސީދާ އޭނާއަށް ވީޑިއޯ މެސެޖެއް ފޮނުވާފައެވެ.
އުމުރުން 41 އަހަރުގެ ޕޯޗުގަލް ކެޕްޓަން ރޮނާލްޑޯގެ މެސެޖުގައި ވަނީ އެކުއްޖާ ޙާލު ރަނގަޅުވުމުން ރޮނަލްޑީގެ މެޗެއް ބަލާލަން އައުމަށާ އަދި އޭނާއާ ބައްދަލު ކޮށްލުމަށް އައުމަށް އެދިފައެވެ.
މިއީ ރޮނާލްޑޯ މިފަދަ އިންސާނިއްޔަތު ކަމުގެ ނަމޫނާއެއް ދެއްކި ފުރަތަމަ ފަހަރެއް ނޫނެވެ. 2023 ވަނަ އަހަރު ތުރުކީ އާއި ސީރިއާއަށް އައި ބިންހެލުމުގައިވެސް އޭނާ ވަނީ ބޮޑެތި އެހީތަކެއް ފޯރުކޮށްދީފައެވެ. މިހާރު ކުރިއަށްދާ ވޯލްޑް ކަޕްގެ ތެރެއިންވެސް، ރޮނާލްޑޯ އާއި ޕޯޗުގަލް ޓީމުން ވަނީ ވެނެޒުއޭލާގެ ބިންހެލުމުގައި މަރުވި މީހުންގެ ހަނދާނުގައި ސުކޫތެއް ގެނެސްފައެވެ.
މި ބިންހެލުމުގެ ހިތާމަ ފުޓްބޯޅަ އާއިލާއަށްވެސް ވަނީ ވަރަށް ބޮޑަށް ކުރިމަތިވެފައެވެ. އެގޮތުން ވެނެޒުއޭލާގެ އުއްމީދީ ޒުވާން ކުޅުންތެރިޔާ، އުމުރުން 18 އަހަރުގެ ޔިމްވަރޓް ބެރޮޓެރަން ވަނީ މި ހާދިސާގައި މަރުވެފައެވެ.
މީގެ އިތުރުން ފީފާއިންވެސް ވަނީ ޖޫން 26 އަދި 27 ގައި ކުޅުނު ހުރިހާ މެޗެއްގެ ކުރިން މި ހާދިސާގެ ޝިކާރައަކަށްވި މީހުންގެ ހަނދާނުގައި ސުކޫތެއް ގެނައުމަށް އަންގާފައެވެ.
Advertisement
This content is created and paid for by advertisers and does not involve Voice Journalists
