ފަރަންސޭސިވިލާތުގެ ތަރި ކީލިއަން އެމްބާޕޭގެ ނަސްލާއި ތަޢުލީމާ ބެހޭގޮތުން ޕެރަގުއޭގެ ސެނެޓަރަކު ކުރި ނަސްލީ ފުރައްސާރަ އެމްބާޕޭ އާއި ފަރަންސޭސި ފުޓްބޯޅަ ފެޑެރޭޝަން (އެފް.އެފް.އެފް) އިން ވަރަށް ބޮޑަށް ކުށްވެރިކޮށްފިއެވެ.
ޕެރަގުއޭގެ ލިބަރަލް ރެޑިކަލް ޕާޓީގެ ސެނެޓަރު ސެލެސްޓޭ އަމަރިއްލާ، ވަނީ ވޯލްޑް ކަޕްގެ ގަދަ 16 ގައި ފަރަންސޭސިވިލާތް އަތުން ޕެރަގުއޭ ބަލިވި މެޗަށްފަހު އެމްބާޕޭއަށް ނިސްބަތްކޮށް ވަރަށް ދަށު ދަރަޖައިގެ ވާހަކަތަކެއް ދައްކާފައެވެ.
އެގޮތުން އޭނާ އަކީ ލިޔަން ކިޔަން ނޭނގޭ ކެމަރޫން މީހެއް ކަމަށާ، މެޗު ނިންމާލުމަށްފަހު ޕެރެގުއޭ ޓީމު މީހުން އެމްޕާބޭގެ މޫނުމަތީގައި ޖަހާލަންވެސް ޖެހޭ ކަމަށް ބުނެފައިވެއެވެ.
މިކަމާ ގުޅިގެން އެމްބާޕޭ ބުނެފައިވަނީ އަމަރިއްލާއަކީ އެ މަޤާމަށް ކުފޫހަމަނުވާ، ދަށުދަރަޖައިގެ އަންހެނެއް ކަމަށެވެ. އަދި އޭނާއަކީ ޕެރަގުއޭ ތަމްސީލުކުރާ މީހެއް ނޫން ކަމަށާއި، އޭނާގެ މި ނާތަހުޒީބު ޢަމަލުގެ ސަބަބުން ޕެރަގުއޭގެ ކުޅުންތެރިން ކުރި ބުރަ މަސައްކަތުގެ މަތިން ދުނިޔެ ހަނދާން ނެތި، ޤައުމުގެ އަގު ވެއްޓިފައިވާ ކަމަށް އެމްބާޕޭ ފާހަގަކުރިއެވެ. އެމްބާޕޭ އިތުރަށް ބުނީ، ދުނިޔޭގައި ނަފްރަތާއި ނަސްލީ ތަފާތުކުރުން ފެތުރުމުގެ ފުރުޞަތު މިފަދަ މީހުންނަށް ނުދޭނެ ކަމަށެވެ.
ފަރަންސޭސި ފުޓްބޯޅަ ފެޑެރޭޝަނުން ވަނީ އަމަރިއްލާގެ މި ވާހަކަތަކަކީ ބަލައިގަނެވޭނެ ކަންތައްތަކެއް ނޫން ކަމަށް ބުނެ، އޭނާއާ ދެކޮޅަށް ޖިނާއީ ދަޢުވާ ކުރުމަށް ނިންމާފައެވެ. އެ އިދާރާއިން ނެރުނު ބަޔާނެއްގައި ބުނެފައިވަނީ، މިއީ މުޅި ފަރަންސޭސިވިލާތަށް ކުރި އިހާނެތްތެރިކަމެއް ކަމަށާއި، މި މައްސަލަ ޕްރޮސިކިއުޓަރަށް ހުށަހަޅާނެ ކަމަށެވެ.
މި މެޗުގައި އެމްބާޕޭ ޖެހި ޕެނަލްޓީއާއެކު އޭނާ ވަނީ މި މުބާރާތުގައި 7 ލަނޑު ހަމަކޮށް، ލިއޮނަލް މެސީ އަދި އާލިން ހާލަންޑާ އެއްވަރަށް އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ކުރީގައެވެ.
މީގެ އިތުރުން، ޕެރަގުއޭގެ ކުރީގެ ގޯލްކީޕަރު ހޯސޭ ލުއިސް ޗިލަވަރޓް ވެސް ވަނީ ފަރަންސޭސި ޓީމަކީ "އެފްރިކާގެ ޓީމެއް" ކަމަށް ބުނެ ނަސްލީ ގޮތުން ފުރައްސާރަކޮށްފައެވެ. އެފް.އެފް.އެފް ގެ ރައީސް ފިލިޕް ޑިއާލޯ ވަނީ ޗިލަވަރޓްގެ މި ވާހަކަތަކީ ލަދުވެތި ވާހަކަތަކެއް ކަމަށް ބުނެ، އޭނާ ކުށްވެރިކުރައްވާފައެވެ
Advertisement
This content is created and paid for by advertisers and does not involve Voice Journalists
