ތުރުކީވިލާތުގެ އިޖުތިމާއީ އަދި އަޚުލާޤީ މިންގަނޑުތަކާ ފުށުއަރާތީ، އެއްޖިންސުން ގުޅުން ހިންގާ މީހުންނަށް (LGBTQ+) ޚާއްޞަކޮށްގެން ދަތުރުކުރަމުންދިޔަ ކްރޫޒް ޝިޕެއް އެޤައުމުގެ ބަނދަރުތަކަށް ކައިރިކުރުން ތުރުކީ ސަރުކާރުން މަނާކޮށްފިއެވެ.
ޖުލައި މަހުގެ 5 އިން 15 އަށް ކުރިއަށްގެންދާ މި ދަތުރަކީ ގްރީސްގެ އެތެންސުން ފުރައިގެން ގްރީސްގެ ރަށްތަކަށާއި ޑަލްމޭޝިއަން ކޯސްޓަށް ދަތުރުކުރުމަށް ރޭވިފައި އޮތް ދަތުރެކެވެ. މި ދަތުރުގެ ތެރެއިން ތުރުކީގެ ކުޝަދާސީ ބަނދަރަށާއި އިސްތަންބޫލްގައި ދެ ދުވަހު މަޑުކުރުމަށް ފަހު، ދަތުރު ނިންމާލުމަށް ހަމަޖެހިފައި އޮތީ އިޓަލީގެ ޓްރިއެސްޓޭ އަށެވެ.
ތުރުކީގެ ކަމާބެހޭ އިދާރާތަކުން ބުނި ގޮތުގައި މި އުޅަނދު ބަނދަރުކުރުން ހުއްޓުވީ، އެ އުޅަނދު ކުއްޔަށް ހިފާފައިވަނީ "ތުރުކީގެ މުޖުތަމައުގެ އާދަކާދަތަކާއި އަޚުލާޤީ މިންގަނޑުތަކާ ނުގުޅޭ" އަމަލުތަކަށް މަޝްހޫރު ގްރޫޕަކުން ކަމަށްވާތީއެވެ.
ސީ.އެން.އެން އިން ރިޕޯޓްކޮށްފައިވާ ގޮތުގައި، މި ނިންމުމަކީ އެޤައުމުގެ އިޖުތިމާއީ ފޭރާން ހިމާޔަތްކުރުމަށް އެޅި ފިޔަވަޅެކެވެ.
ތުރުކީވިލާތުގައި އެއްޖިންސުން ގުޅުން ހިންގުމަކީ ޤާނޫނީ ގޮތުން ކުށެއްގެ ގޮތުގައި ކަނޑައަޅާފައި ނޯވެއެވެ. ނަމަވެސް 2015 ވަނަ އަހަރުން ފެށިގެން އިސްތަންބޫލްގައި ބާއްވަމުން އައި "ޕްރައިޑް މާޗް" ތައް ބޭއްވުން ވެސް ތުރުކީ ސަރުކާރުން ވަނީ މަނާކޮށްފައެވެ.
Advertisement
This content is created and paid for by advertisers and does not involve Voice Journalists
