މަނީ ލޯންޑަރިންގެ މައްސަލައެއްގައި އެމެރިކާގެ އެފްބީއައި އިން އާޖެންޓީނާގެ ފުޓްބޯޅަ އެސޯސިއޭޝަން (އޭއެފްއޭ) ގެ މައްސަލައެއް ބަލަން ފަށައިފިއެވެ.
މީޑިއާގެ ރިޕޯޓްތަކުގައި ބުނެފައިވަނީ، އާޖެންޓީނާގެ ފުޓްބޯޅަ ފެޑަރޭޝަނުގެ ރައީސް ކްލައިޑިއޯ ޓާޕިއާގެ ބައިވެރިވުމާއެކު ހިންގާފައިވާ މި މާލީ މުއާމަލާތްތައް މިހާރު ވަނީ ކަމާބެހޭ ތަހްގީގީ އިދާރާތަކުގެ ސަމާލުކަމަށް އައިސްފައެވެ. މިވާހަކަ އެންމެ ފުރަތަމަ ރިޕޯޓްކުރި އެއް މީޑިއާއަކީ އެމެރިކާގެ ފޮކްސް ސްޕޯޓްސްއިން ނެވެ. އާޖެންޓީނާގެ އެފްއޭއިން މި މުއާމަލާތްތައް ހިންގާފައިވަނީ، އެމެރިކާގެ މާލީ ނިޒާމު މެދުވެރިކޮށް އެތައް ސަތޭކަ މިލިއަން ޑޮލަރެއް ދައުރުވާ ގޮތަށް ކަމަށްވާއިރު، މި މުއާމަލާތްތައް އެމެރިކާގެ ޤާނޫނުތަކާ ހިލާފްވޭތޯ ބެލުމުގެ މަސައްކަތް މިހާރު ފަށާފައިވާކަމަށް ފޮކްސްއިން ވަނީ ބުނެފައެވެ. އަދި މިކަމުގައި ޖިނާއީގޮތުން ކޮށްފައިވާ ކުށްތައް ބަލަމުންދާކަމަށް ބުންޏެވެ.
މި މައްސަލައިގައި ބޮޑަށް ތުހުމަތު ކުރެވެނީ ފްލޮރިޑާގައި ގާއިމުކޮށްފައިވާ "ޓުއަރޕްރޮޑް އެންޓަރ އެލްއެލްސީ" ނަމަކަށް ކިޔާ ކުންފުންޏަކަށެވެ. މިއީ އޭއެފްއޭގެ ބޭރުގެ މާލީ ކަންކަން ބަލަހައްޓާ ކުންފުންޏެއްކަމަށް ބުނެއެވެ. މި ކުންފުނީގެ ވެރިޔަކީ ތިއޭޓަރުގެ ވިޔަފާރިވެރިއެއް ކަމަށްވާ ހަވިއަރ ފަރޯނީއެވެ. ރިޕޯޓުގައިވާ ގޮތުން ފަރޯނީ އާއި އޭނާގެ އަނބިކަނބަލުން އެރިކާ ގިލެޓް ވަނީ އެމެރިކާގެ ބޮޑެތި ފަސް ބޭންކެއްގައި ހުޅުވާފައިވާ އެކައުންޓުތައް މެދުވެރިކޮށް އެތައް ސަތޭކަ މިލިއަން ޑޮލަރެއް ދައުރުކޮށްފައެވެ. މީގެ ތެރޭގައި ސިޓީ ބޭންކް، ބޭންކް އޮފް އެމެރިކާ އަދި ޖޭޕީ މޯގަން ފަދަ ބޭންކުތައް ހިމެނެއެވެ.
ލިޔެކިޔުންތަކުން ދައްކާ ގޮތުގައި މި އެކައުންޓުތައް މެދުވެރިކޮށް އޭއެފްއޭގެ އާމްދަނީގެ ތެރެއިން 260 މިލިއަން ޑޮލަރު މެނޭޖްކޮށްފައިވާއިރު، މީގެ ތެރެއިން ބައެއް ފައިސާއަކީ އެސޯސިއޭޝަންގެ ހިންގުމުގެ ހަރަދުތަކާ ސީދާ ގުޅުންހުރި ފައިސާކަން އަދި މިހާތަނަށް ކަށަވަރު ކުރެވޭކަށް ނެތެވެ. އަދި އިތުރު 57 މިލިއަން ޑޮލަރު އެކި ކުންފުނިތަކަށާއި ފަރާތްތަކަށް ބަހާފައިވާއިރު، އެ ފައިސާ ދޫކުރި މާލީ ލިޔެކިޔުންތައް ފެންނައްނެތްކަމަށް ވެއެވެ.
އާޖެންޓީނާގެ އެފްއޭއިން މަނީ ލޯންޑަރ ކުރުމުގެ އަމަލުތަކެއް ހިންގާފައިވާކަމަށް މީޑިއާތަކުން ރިޕޯޓްކޮށްފައިވާއިރު، ވަރލްޑްކަޕަށް ތައްޔާރުވަމުންދިޔައިރު، ޓާޕިއާގެ މައްޗަށް އެކިއެކި ކަންކަމުގައި ވަނީ ތުހުމަތުތައް ކުރެވިފައެވެ. މީގެ ތެރޭގައި ޓާޕިއާގެ މައްޗަށް ޓެކުހަށް މަކަރުހެދިކަމުގެ ތުހުމަތުގައި ވަނީ ދައުވާވެސް އުފުލާފައެވެ.
Advertisement
This content is created and paid for by advertisers and does not involve Voice Journalists
