ކިލިއަން އެމްބާޕޭގެ މޮޅު ކުޅުމާއެކު މޮރޯކޯ ބަލިކޮށް ވަރލްޑްކަޕް ސެމީފައިނަލުގެ ޖާގައެއް ފަރަންސޭސިން ހޯދައިފިއެވެ.

މުބާރާތުގެ ކުއާޓާ ފައިނަލުގައި ރޭ ފްރާންސް އާއި މޮރޯކޯ ބައްދަލުކުރިމެޗް ފްރާންސުން ކާމިޔާބުކުރީ 2-0 ގެ ނަތީޖާއިންނެވެ. ރޭގެ މެޗްގައި ތަރިއަކަށްވީ ފްރާންސްގެ އެމްބަޕޭއެވެ. އޭނާ ވަނީ ގޯލެއް ޖެހުމުގެ އިތުރުން ފްރާންސަށް ދެވަނަ ގޯލެއް ޖެހުމަށް ފުރުސަތު ތަނަވަސްކޮށްދީފައެވެ.

މެޗްގައި ފްރާންސްގެ ލަނޑުތައް ފެނިގެން ގޮސްފައިވަނީ ދެވަނަ ހާފްގައެވެ. އޭގެ ކުރިން ފުރަތަމަ ހާފްގައި ނަތީޖާ ބަދަލުކޮށްލާނެ ރަނގަޅު ފުރުސަތުތައް ފްރާންސަށް ވަނީ ލިބިގެންގޮސްފައެވެ. ފްރާންސްގެ ފޯވާޑުންގެ ތެރެއިން އެމްބާޕޭ އަދި ޑެމްބަލޭ ވަނީ މި ހާފްގައި މޮރޯކޯގެ ޑިފެންސްލައިން ފޫ އަޅުވާލައި ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. މީގެ ތެރެއިން ގިނަ ހަމަލާތައ ްދިފާއުކުރީ މޮރޯކޯގެ ކީޕަރެވެ.

ފުރަތަމަ ހާފްގައި ފްރާންސަށް ޕެނަލްޓީއެއްވެސް ލިބުނެވެ. ނަމަވެސް އެމްބާޕޭ ޖެހި ޕެނަލްޓީ ވަނީ މޮރޮކޯގެ ކީޕަރު ޔާސީން ބޫނޫ ވަނީ ދިފާއުކޮށްފައެވެ. މެޗްގައި ފްރާންސުން ޖެހި ފުރަތަމަ ލަނޑު އެމްބާޕޭ ކާމިޔާބުކުރީ 60 ވަނަ މިނެޓް ތެރޭގައެވެ. އަދި ދެވަނަ ލަނޑު ޑެމްބެލޭ ޖަހާފައިވަނީ 66 ވަނަ މިނެޓް ތެރޭގައެވެ.

މިމެޗްގައި އަނިޔާގެ ސަބަބުން މޮރޯކޯގެ އިސްމާޢީލް ސައިބާރީއަށް ނުކުޅެވުމުން އެޓީމްްގެ ފަރާތުން ފެނުނު އެޓޭކުތައް ފެނިގެންދިޔައީ ވަރަށް ބަލިކަށިކޮށެވެ. ކޯޗު ޑިޑިއޭ ޑެޝޯމްޕްގެ އިރުޝާދުގެ ދަށުން ކުޅެމުންދާ ފަރަންސޭސި ޓީމުން ސެމީ ފައިނަލުގައި ބައްދަލުކުރަން ޖެހޭނީ ސްޕެއިން ނުވަތަ ބެލްޖިއަމް ބައްދަލުކުރާ މެޗުން މޮޅުވާ ޓީމަކާއެވެ.

ވަރލްޑްކަޕް ކުއާޓާފައިނަލުގައި ރޭ ސްވިޒަރލެންޑާއި ކޮލަމްބިއާ ބައްދަލުކުރިމެޗް ޕެނަލްޓީ ޖަހައިގެން ސެމީއަށް ދިޔައީ ސްވިޒަރލޭންޑެވެ.