ރާއްޖޭގެ ރަށްރަށުގައި ޖަމާވާ ކުނި ރައްކާތެރިކަމާ އެކު އުފުލުމަށް ކަނޑުމަގުން ދުއްވާ ޚާއްޞަ އުޅަނދުތަކެއް ބޭނުންކުރަން ފަށާނެ ކަމަށް އެންވަޔަރަމަންޓް މިނިސްޓްރީން މިއަދު ބުނެފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ މިނިސްޓްރީގެ ވޭސްޓް މެނޭޖްމަންޓް އެންޑް ޕޮލިއުޝަން ކޮންޓްރޯލްގެ ޑިރެކްޓާ ޖެނެރަލް އަހުމަދު މުރުތަލާ ވިދާޅުވީ ރަށްރަށުގައި ކުނި މެނޭޖުކުރުމަށް ފަހު އެ ތަކެތި ބޭރުކުރެވޭނެ ވަސީލަތްތައް ބޭނުންވާ ކަމަށެވެ. "ރަށްރަށުގައި އުފައްދާ ކުނި މެނޭޖްކުރުމަށްފަހު އެތަކެތި ބޭރުކުރުމަށް ވަސީލަތްތައް ބޭނުންވޭ. މެރިން ޓްރާންސްޕޯޓްއަށް ކަމަށްވާތީ ކަނޑުގައި ދުއްވާ މިކަމަށް ހާއްސަކޮށް ޑިޒައިން ކުރެވިގެން އުޅަނދުތައްވެސް ހޯދަން އެބަޖެހޭ." ކަމަށް މުރުތަލާ ވިދާޅުވިއެވެ.

މި މަސައްކަތުގެ ދަށުން ޖުމްލަ ތިން އުޅަނދު ބަނުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ. އޭގެ ތެރެއިން އިންޑިއާގައި ބަންނަ އުޅަނދު ނިމިފައިވާ ކަމަށާއި އެ އުޅަނދު ރާއްޖެ ގެނައުމުގެ ފަހުގެ ތައްޔާރީތައް ވަމުންދާ ކަމަށް މުރުތަލާ ވިދާޅުވިއެވެ. ރާއްޖޭގައި ބަނދެވޭ ދެ ލޭންޑިން ކްރާފްޓުގެ މަސައްކަތް އަންނަ އަހަރުގެ ޖުލައި މަހަށް ނިންމައި އޮޕަރޭޝަނަށް ނެރެވޭނެ ކަމަށް ވެސް އޭނާ ވިދާޅުވިއެވެ.

މުރުތަލާ ވިދާޅުވީ ސަރުކާރުގެ ކުނި މެނޭޖުކުރުމުގެ ޤައުމީ ސިޔާސަތު ބިނާވެފައި ވަނީ ގްރީން އިކޮނޮމީ އާއި ސާކިއުލާ އިކޮނޮމީއަށް އަމާޒުކޮށް ފަރުމާކުރެވިފައިވާ ނިޒާމެއްގެ މައްޗަށް ކަމަށެވެ. މި ދާއިރާ މިހާރު ޤާނޫނީ ގޮތުން ޔުޓިލިޓީ ޚިދުމަތެއްގެ ގޮތުގައި ކަނޑައަޅާފައިވާ ކަމަށާއި ކުނި މެނޭޖުކުރުމުގެ ޤާނޫނުގެ ދަށުން ކުނި މެނޭޖުކުރުމުގެ ޢާންމު ގަވާއިދާއި ޚިދުމަތް ދިނުމާ ބެހޭ ގަވާއިދުގެ އިތުރުން އެއް ފަހަރު ބޭނުންކޮށްފައި އުކާލާ ޕްލާސްޓިކް މަދުކުރުމާ ބެހޭ ގަވާއިދު ފަދަ މުހިންމު ގަވާއިދުތައް އެކުލަވާލާފައިވާ ކަމަށް ވެސް އޭނާ ވިދާޅުވިއެވެ.