ޤަޠަރުގެ ކުރީގެ އަމީރު ޝައިޚް ޙަމަދު ބިން ޚަލީފާ އަލްޘާނީ، އުމުރުފުޅުން 74 އަހަރުގައި އަވަހާރަވެއްޖެއެވެ.

ޤަޠަރުގެ ރަސްމީ އިދާރާ، އަމީރީ ދީވާނުން ނެރުނު ބަޔާނެއްގައި ބުނެފައިވަނީ، ޝައިޚް ޙަމަދު އަވަހާރަވީ މިއަދު ހެނދުނުގެ ވަގުތެއްގައި ކަމަށެވެ.

މި  ޚަބަރު އިޢުލާން ކުރަމުން އަމީރީ ދީވާނުން ބުނެފައިވަނީ، މިއަދު މި ގެއްލިގެން ދިޔައީ މުޅި ޤައުމަށް ލިބުނު ވަރަށް ބޮޑު ފަޚުރެއް ކަމަށެވެ. އަދި މިއީ ލިބުނު ބޮޑު ހިތާމައެއް ކަމަށެވެ.

ޝެއިޚް ހަމަދު އަކީ 1995 ވަނަ އަހަރުން ފެށިގެން 2013 ވަނަ އަހަރާ ހަމައަށް ޤަޠަރުގެ އަމީރުކަން ކުރެއްވި ބޭފުޅާއެވެ. އެމަނިކުފާނު ވެރިކަން ދޫކޮށްލެއްވީ 2013 ވަނަ އަހަރު، ހަތަރުވަނަ ދަރިކަލުން ތަމީމް ބިން ޙަމަދު އާލްޘާނީއާ ވެރިކަން ޙަވާލުކުރެއްވުމަށްފަހުގައެވެ. ޤަޠަރުގެ ސަރުކާރުން އެމަނިކުފާނަށް ނިސްބަތްކޮށް ކިޔައި އުޅެނީ "ފާދަރ އެމީރު" (އަމީރުންގެ ބާނީ) އެވެ. 

އަމީރުގެ ހައިސިއްޔަތުން ޙަމަދު ޤަޠަރުގައި ވެރިކަން ކުރެއްވީ ދައުލަތުގެ ހުރިހާ ބާރުތަކެއް އޮންނަ މުޠުލަޤު ރަސްކަމެއްގެ ގޮތުގައެވެ. އަދި އެމަނިކުފާނުގެ ވެރިކަމުގައި އެއްވެސް ސިޔާސީ ޕާޓީއަކަށް ހަރަކާތްތެރިވުމުގެ ފުރުޞަތެއް ނޯވެއެވެ.

ޙަމަދުގެ 18 އަހަރުވީ ދިގު ވެރިކަމުގައި، ޤަޠަރުގެ ގޭސް އުފައްދާ މިންވަރު 77 މިލިއަން ޓަނަށް އިތުރުވެގެންދިޔައެވެ. މީގެ ސަބަބުން، ބޮލަކަށް ޖެހޭ އާމްދަނީގެ ނިސްބަތުން ޤަޠަރަކީ ދުނިޔޭގެ އެންމެ މުއްސަނދި ޤައުމަށް ވެގެންދިޔައެވެ. އެގޮތުން އަހަރަކު މީހަކަށް ޖެހޭ އެވްރެޖް އާމްދަނީ 86,440 އެމެރިކާ ޑޮލަރަށް އެރިއެވެ.

އެމަނިކުފާނުގެ ޒަޢާމަތުގައި ކުޅިވަރާއި ޚާރިޖީ ދާއިރާގެ ބޮޑެތި ހަރަކާތްތަކެއް ޤަޠަރުގައި ބޭއްވުނެވެ. މީގެ ތެރޭގައި 2006 ވަނަ އަހަރުގެ އޭޝިއަން ގޭމްސް، 2012 ވަނަ އަހަރުގެ އދ. ގެ މޫސުމަށް އަންނަ ބަދަލުތަކާ ބެހޭ ކޮންފަރެންސް، ދޯހާ އެއްބަސްވުން، ފަތަޙަ-ޙަމާސް ދޯހާ އެއްބަސްވުން، އަދި 2022 ވަނަ އަހަރުގެ ފީފާ ވޯލްޑް ކަޕް ބޭއްވުމުގެ ފުރުޞަތު ހޯދުން ހިމެނެއެވެ. 

މީގެ އިތުރުން، އެމަނިކުފާނު ވަނީ ޤަޠަރު އިންވެސްޓްމަންޓް އޮތޯރިޓީ (ކިއު.އައި.އޭ) އުފައްދަވާފައެވެ. 2013 ވަނަ އަހަރާ ހަމައަށް އައިއިރު، އެ އޮތޯރިޓީ މެދުވެރިކޮށް ދުނިޔޭގެ އެކި ކަންކޮޅުތަކުގައި 100 ބިލިއަނަށްވުރެ ގިނަ ޑޮލަރު އިންވެސްޓްކޮށްފައިވެއެވެ. އޭގެ ތެރޭގައި "ދަ ޝާޑް" އިމާރާތް، ބާކްލީސް ބޭންކް، ހީތުރޯ އެއާޕޯޓް، ހެރޮޑްސް، ޕެރިސް ސެއިންޓް ޖާމަން ކްލަބް، ވޮކްސްވޭގަން، ސީމެންސް އަދި ރޯޔަލް ޑަޗް ޝެލް ފަދަ މަޝްހޫރު ކުންފުނިތަކާއި ތަންތަން ހިމެނެއެވެ.