ފެނަކައިން ކުޅުދުއްފުއްޓަށް ކަރަންޓްގެ ހިދުމަތް ދިނުމަށް ކުޅުދުއްފުށީސިޓީ ކައުންސިލާއެކު އެއްބަސްވުމެއް ހަދަން ނުޖެހޭނޭކަމަށް ސިވިލްކޯޓުން ކަނޑައަޅައިފިއެވެ.

ކުޅުދުއްފުށީސިޓީ ކައުންސިލުން ވަނީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން ކުޅުދުއްފުއްޓަށް ފޯރުކޮށްދޭންޖެހޭ ކަރަންޓްގެ ހިދުމަތް ފޯރުކޮށްދިނުން އެ ސިޓީއަށް ލާޒިމްކޮށްފައި އޮތުމުން ފެނަކައާއެކު އެކަން ކުރުމަށް އެއްބަސްވުމެއް ގާއިމްކުރުމަށް އެކުންފުނިން އެއްބާރުލުން ނުދިނުމުން އެ މައްސަލަ ސިވިލްކޯޓަށް ހުށަހަޅާފައެވެ. 

މި މައްސަލާގައި ކުޅުދުއްފުށީ ސިޓީ ކައުންސިލުން ހުށަހެޅި ކަންތައްތަކުގެ ތެރޭގައު ކުޅުދުއްފުއްޓަށް ފެނަކަ މެދުވެރިކޮށް ކަރަންޓް ދިނުމުގެ ބޭނުމަށް ފެނަކައާއި ސިޓީ ކައުންސިލާ ދެމެދު އެއްބަސްވުމެއް އެކުލަވާލަންޖެހޭނެ ކަމަށް ކަނޑައަޅައިދިނުން ހިމެނެއެވެ.

މި މައްސަލާގައި ދައުވާ ލިބޭ ފެނަކައިން އެދިފައިވަނީ، އެއްބަސްވުން ގާއިމްކުރަން އަމުރު ކުރަންޖެހޭ ތަނެއް ނެތްކަމަށާއި، އަދި އެއްބަސްވުން ގާއިމް ނުކުރުމަކީ ކައުންސިލްގެ ޤާނޫނީ ޒިންމާ އަދާކުރުމަށް ހުރަސްއެޅޭނެ ކަމެއް ނޫންކަމަށެވެ.

މި މައްސަލަ ބެއްލެވުމަށްފަހު ދެފަރާތުން ހުށަހެޅި ކަންތައްތަކަށް ރިޔާއަތް ކުރައްވައި ފަނޑިޔާރުން ވަނީ ފެނަކައިން ހިދުމަތް ދެމުންގެންދަނީ ދިވެހި ސަރުކާރުން އެ ހިދުމަތް ދިނުން އެފަރާތައް ލާޒިމްކޮށްގެން ކަމަށްވާތީ، މައްސަލާގައި އިތުރަށް ގޮތް ކަނޑައަޅަންޖެހޭ ނުކުތާއެއް ނެތްކަން ފާހަގަކުރައްވާފައެވެ. 

އެހެންކަމުން ސިވިލްކޯޓުން ވަނީ ކުޅުދުއްފުށީ ކައުންސިލުން ފެނަކައިގެ މައްޗަށް ރައްދުކޮށް ހުށަހެޅި އެ ދައުވާ ސާބިތުނުވާކަމަށް ނިޔާ ކަނޑައަޅާފައެވެ.