ފީފާ ވޯލްޑް ކަޕްގެ ސެމީ ފައިނަލުގައި އާޖެންޓީނާ އާއި އިންގްލެންޑް ބައްދަލުކުރާ މެޗު ރެފްރީކުރުމަށް އެމެރިކާގެ އިސްމާއިލް އެލްފަތު ހަމަޖައްސައިފިއެވެ.

މި މެޗުގައި އެލްފަތަށް އެހީތެރިވެދޭނީ އެމެރިކާގެ ކޯރީ ޕާކާ އާއި ކައިލް އެޓްކިންސްއެވެ. ހަތަރުވަނަ އޮފިޝަލެއްގެ ގޮތުގައި އިޓަލީގެ މައުރީޒިއޯ މަރިއާނީ ހަރަކާތްތެރިވާއިރު ރިޒާވް އެސިސްޓަންޓަކީ އިޓަލީގެ ޑަނިއެލޭ ބިންދޯނީއެވެ.

މި ޓީމު އިއުލާނުކުރުމާއެކު ސޯޝަލް މީޑިއާގައި ގިނަ ބަޔަކު އަންނަނީ މެސީ ކުޅޭ މެޗުތަކުން ޓީމު މޮޅުވުމާ އެލްފަތާގެ ރެފްރީކަމާ ދެމެދު ޚާއްޞަ ގުޅުމެއް ވާކަމަށް ބުނަމުންނެވެ.

"މެސީ އިންޓަރ މިއާމީއާ ގުޅުނު ފަހުން އެލްފަތާގެ ދަށުން ކުޅުނު ހުރިހާ މެޗެއްގައި 100 އިންސައްތަ މޮޅުވުމުގެ ރެކޯޑް އެ ޓީމު ދަމަހައްޓާފައިވޭ. އަދި ލީގްސް ކަޕް ފައިނަލްވެސް ކާމިޔާބުކޮށްފައިވޭ. ގޭމް ފެށުމުގެ ކުރިންވެސް އިންގްލެންޑަށް ބޭއިންސާފު ވެއްޖެ" "ޓަޗްމައިންއެކްސް" ނަމުގައި ހިންގާ އެކައުންޓަކުން ކުރި ޕޯސްޓެއްގައި ބުނެފައިވެއެވެ.

އެލްފަތު

މެސީ އިންޓަރ މިއާމީއަށް ބަދަލުވި ފަހުން އެލްފަތު ރެފްރީކުރި ތިން ރެގިއުލާ ސީޒަން މެޗާއި 2023 ވަނަ އަހަރުގެ ލީގްސް ކަޕް ފައިނަލުގައި ނޭޝްވިލްއާ ދެކޮޅަށް ކުޅުނު މެޗުގައި އިންޓަރ މިއާމީ ވަނީ ކޮންމެ މެޗެއްގައިވެސް 3 ޕޮއިންޓް ހޯދާފައެވެ.

މީގެ އިތުރުން 2022 ވަނަ އަހަރުގެ ވޯލްޑް ކަޕް ފައިނަލުގައި ސިމޯން މާރސިނިއެކުގެ އެހީތެރިއެއްގެ ގޮތުގައި ހަރަކާތްތެރިވެފައިވެއެވެ. މި ފަހަރުގެ މުބާރާތުގައި އެލްފަތު ވަނީ ޖަޕާން އާއު ނެދަރލޭންޑްސް، ޔުރުގުއޭ އާއި ސްޕެއިން އަދި ބްރެޒިލް އާއި ނޯވޭ މެޗުތައް ރެފްރީކޮށްފައެވެ.