ފަހަތުން އަރައި އިނގިރޭސިވިލާތް ބަލިކޮށް އާޖެންޓީނާ ވަރލްޑްކަޕް ފައިނަލަށް ދަތުރުކޮށްފިއެވެ.

އެމެރިކާގެ އެޓްލާންޓާގައި ކުޅުނު މިމެޗް އިނގިރޭސިންގެ މައްޗަށް އާޖެންޓީނާ ކުރި ހޯދީ 2-1 ގެ ނަތީޖާއަކުންނެވެ. މެޗްގެ ފުރަތަމަ ހާފްގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ. މި ހާފްގައި ދެޓީމަށްވެސް ލަނޑުޖަހާނެ ފުރުސަތެއް ލިބިގެން ގޮސްފައިނުވާކަން ފާހަގަކޮށްލެވެއެވެ. އޭގެ ބަދަލުގައި ދެޓީމްގެ ފަރާތުންވެސް ފައުލްތައް ފެނިގެންދިޔައެވެ.

މެޗްގައި އިނގިރޭސިވިލާތުން ލީޑް ނަގާފައިވަނީ 55 ވަނަ މިނެޓް ތެރޭގައެވެ. މި ލަނޑު ޖަހައިދިނީ ގޯޑޮންއެވެ. މި ލަނޑަށްފަހު އާޖެންޓީނާއިން ވަނީ 64 ވަނަ މިނެޓް ތެރޭގައި ޔުވެންޓަސްގެ ގޮންޒާލެޒް، އޮޓަމެންޑީ އަދި މާޓިނެޒް ކުޅެން އަރުވައި އެޓޭކް ވަރުގަދަކޮށްފައެވެ. ނަތީޖާ އަކަށްވެގެންދިޔައީ 85 ވަނަ މިނެޓް ތެރޭގައި ލިއޮނެލް މެސީ ތަނަވަސްކޮށްދިން ފުރުސަތެއްގައި އެންޒޯ ފެނާންޑެޒް ލަނޑެއް ޖަހައި މެޗް އެއްވަރުކުރުމެވެ. މެޗުން އާޖެންޓީނާ މޮޅުކޮށްދިން ލަނޑު ޖަހައިދިނީ އިތުރުވަގުތުގެ ކުޅުމުގެ ތެރޭގައި އިންޓަމިލާންގެ މާޓިނޭޒް އެވެ. 

މެޗްގެ ފަހުހާފްގައި އާޖެންޓީނާއިން މެޗް ޑޮމިނޭޓްކޮށް އިނގިރޭސިންގެ ގޯލަށްވަނީ ނުރައްކާތެރި ގިނަ ހަމަލާތަކެއް ފޮނުވާލާފައެވެ. މީގެ ތެރެއިން އެއް ހަމަލާ ވަނީ ދަނޑީގައި ޖެހިފައެވެ.

ވަރލްޑްކަޕް ސެމީފައިނަލުގައި އާޖެންޓީނާ ނިކުންނާނީ ސްޕެއިން އާ ދެކޮޅަށެވެ. މިމެޗް ކުޅުމަށް ހަމަޖެހިފައިވަނީ މިމަހުގެ 19 ވާ އާދިއްތަދުވަހުއެވެ. ފައިނަލްމެޗް ކުޅުމަށް ތާވަލްކޮށްފައިވަނީ އެމެރިކާގެ ނިއުޔޯކްގެ ނިއުޖާޒީ ސްޓޭޑިއަަމްގައެވެ.