އަހަރެމެންގެ ތެރެއިން ބައެއް މީހުންނަކީ ވަރަށް އާދައިގެ، ކުދި ތަދުތަކަށް ބާރުގަދަ ތަދުކަނޑުވާ ބޭސްކާ މީހުންނެވެ. އެގޮތުން، ބައެއް މީހުންނަކީ، އާދައިގެ ބޮލުގެ ރިހުމާއި، ހުމާއި އަދި ބުރަކށީގައި ރިހޭ ރިހުމަށް ލުއި ހޯދަންވެސް ބާރުގަދަ ތަދުކަނޑުވާ ބޭސް އާދަކޮށް ކައި އުޅޭ މީހުންނެވެ.
ނަމަވެސް މިފަދައިން އާދަވެގެން ގިނައިން، ބާރުގަދަ ތަދުކަނޑުވާ ބޭސް ކެއުމަކީ އަހަރެމެންގެ ހަށިގަނޑަށް ޚާއްސަކޮށް ކިޑްނީއަށް ވަރަށް ނުރައްކާތެރި ކަމެކެވެ.
އެކަމަށް އަލިއަޅުވާލައި އައިޖީއެމްއެޗް ހޮސްޕިޓަލުން އާއްމު ކުރި ވީޑިއޯއެއްގައި، އެ ހޮސްޕިޓަލުގެ ރެޖިސްޓާޑް ނަރުސް އާމިނަތު ރައުޝާ ބުނީ، ’ޑައިކްލޮފެނެކް‘ ފަދަ ތަދުކަނޑުވާ ބޭސް އާއްމު ގޮތެއްގައި ބޭނުން ކުރުމަކީ ރަނގަޅު ކަމެއް ނޫން ކަމަށެވެ.
އެހެނީ އެފަދަ ބޭސް ތަކަކީ ގިނައިން ބޭނުން ކުރުމުން ކިޑުނީއަށް ލޭ ދައުރުކުރާ މިންވަރު މަދު ކުރާ ބޭސްތަކެއް ކަމަށެވެ.
އެހެންކަމުން، ޚާއްސަކޮށް ހަކުރު ބަލި ހުންނަ މީހުންނާއި، ލޭގެ ޕްރެޝަރު މައްޗަށްދާ މީހުން، އަދި ކުރިންވެސް ކިޑްނީ ބައްޔަކަށް ފަރުވާ ކޮށްފައިވާ މީހުން އެފަދަ ބޭސް ބޭނުންކުރާއިރު ވަރަށް ބޮޑަށް ސަމާލުވާންޖެހޭނެ ކަމަށް އޭނާ ބުންޏެވެ.
”ޑޮކްޓަރެއްގެ ލަފާއާއި ނުލައި، މިފަދަ ބޭސްތައް އާއްމުކޮށް ބޭނުންކުރުމަކީ ކިޑްނީ އެއްކޮށް ހަލާކުވެދާނެ ކަމެއް.“ ރައުޝާ ބުނެފައިވެއެވެ.
އެހެންކަމުން، ވަގުތީ ތަދުތަކަށް ލުޔެއް ހޯދުމުގެ ތެރެއިން ކިޑްނީ ހަލާކުކޮށްލާ އެފަދަ އާދަތަކުން ދުރުހެލިވުމަށް އޭނާ ނަޞޭޙަތްތެރިވިއެވެ.
Advertisement
This content is created and paid for by advertisers and does not involve Voice Journalists
