މިދިޔަ ހަފްތާ އެކަނިވެސް ހިމަބިހީގެ 22 ކޭސް ފެނިފައިވާކަމަށް ހެލްތު ޕްރޮޓެކްޝަން އޭޖެންސީ، އެޗްޕީއޭއިން ބުނެފިއެވެ.

ރާއްޖޭގައި ހިމަބިހި ފެތުރެން ފަށާފައިވާއިރު، މި ބައްޔާ ގުޅޭ އެންމެފަހުގެ މައުލޫމާތު ހާމަކުރަމުން އެޗްޕީއޭއިން ބުނީ ހިމަބިހީގެ 22 ކޭސް އެންމެފަހުން ފެނުނުއިރު، އެ ހުރިހާ މީހުންނަކީވެސް މާލެ ސަރަހައްދުން ފެނުނު މީހުންކަމަށެވެ. އެއާއެކު ހިމަބިހި ޖެހުނު ޖުމްލަ މީހުންގެ އަދަދު 166 އަރާފައިވާކަން އެޗްޕީއޭއިން ބުންޏެވެ.

ހިމަބިއްސާ ދެކޮޅަށް ކުރަމުންގެންދާ މަސައްކަތްތަކުގެ ދަށުން މިހާތަނަށް 9918 ފަރާތަކަށް ވެކްސިން ދީފައިވާކަމަށްވެސް އެޗްޕީއޭއިން ބުންޏެވެ. 

އެޗްޕީއޭއިން އާންމުކުރި ތަފާސްހިސާބުތަކަށް ބަލާއިރު، ބައްޔަށް ޕޮޒިޓިވްވި މީހުންގެ ތެރޭގައި ގިނައީ 18 އަހަރުން މަތީގެ މީހުންނެވެ. ބަލީން ރައްކާތެރިވުމަށް މިހާރު ދަނީ ވެކްސިން ވެސް ދެމުންނެވެ.

ބައްޔަށް ޝައްކުވެގެން ޓެސްޓެއް ހަދައިފިނަމަ، ނަތީޖާ ލިބެންދެން އެކަހެރިވެގެން ހުރުން.

ހުން އައުމާއެކު ގައިގައި ރަތް ބިހި ނެގުން ނުވަތަ ރޯގާގެ އަލާމާތެއް ހުރިނަމަ، މީހުން އެއްވެ އުޅޭ ތަންތަނަށް ނުދިއުން.

ބަލީގެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުން.

ހޮސްޕިޓަލަށް ދާއިރު، އެހެން މީހުންނަށް ބަލި ފެތުރުނަ ނުދިނުމަށްޓަކައި މާސްކު އެޅުން.

ހިމަބިހިން ރައްކާތެރިވުމަށް އޮތް އެންމެ މުހިންމު ފިޔަވަޅަކީ ވެކްސިންގެ ދެ ޑޯޒް ފުރިހަމަކުރުން ކަމުން އެޗްޕީއޭ އިން މިހާރު ވަނީ ވެކްސިން ދިނުމުގެ ޕްރޮގްރާމް ފުޅާކޮށްފަ އެވެ.