ސަރުކާރުގެ ވުޒާރާތަކުގެ ޕާމަނަންޓް ސެކްރެޓަރީންނާއި ލޯކަލް ކައުންސިލްތަކުގެ ސެކްރެޓަރީ ޖެނެރަލުންނަށް ދެމުންދާ މުސާރައާއި އިނާޔަތްތައް އަންނަ މަހުން ފެށިގެން ކުޑަކުރުމަށް ނޭޝަނަލް ޕޭ ކޮމިޝަނުން ނިންމައިފިއެވެ.

ސިވިލް ސާވިސް ކޮމިޝަނުން (ސީއެސްސީ) މި މަގާމުތަކުގައި ތިއްބެވި ބޭފުޅުންނަށް ފޮނުއްވި ސާކިއުލާގައި ބަޔާންކޮށްފައިވާ ގޮތުން، މުސާރައިގެ މި ބަދަލުތައް ގެނެސްފައިވަނީ ޕާމަނަންޓް ސެކްރެޓަރީންނާއި ސެކްރެޓަރީ ޖެނެރަލުންގެ އިތުރުން އައިޓީ ދާއިރާގެ ތިން ޖޮބް މެޓްރިކްސްއެއްގެ މުވައްޒަފުންނަށެވެ. މީގެ ކުރިން ޕާމަނަންޓް ސެކްރެޓަރީންނާއި ސިޓީ ކައުންސިލްތަކުގެ ސެކްރެޓަރީ ޖެނެރަލުންނަށް މުސާރައިގެ ގޮތުގައި ގާތްގަނޑަކަށް 53,000 ރުފިޔާ ލިބެމުން ދިޔައެވެ.

ރޭންކް 17 ގެ ޕާމަނަންޓް ސެކްރެޓަރީންނާއި ސިޓީ ކައުންސިލް ސެކްރެޓަރީ ޖެނެރަލުން: އަސާސީ މުސާރައަކީ 23,935 ރުފިޔާއެވެ. އެގްޒެކެޓިވް އެލަވަންސަކީ 23,065 ރުފިޔާއެވެ.

ރޭންކް 16 ގެ ރަށު ކައުންސިލް ސެކްރެޓަރީ ޖެނެރަލުން: އަސާސީ މުސާރައަކީ 18,000 ރުފިޔާއެވެ. އެގްޒެކެޓިވް އެލަވަންސަކީ 6,620 ރުފިޔާއެވެ.

ޑިޕްލޮމާ އަދި ތަޖުރިބާގެ އޮނިގަނޑުން ރޭންކް 16 ގައި ތިއްބެވި ސެކްރެޓަރީ ޖެނެރަލުން: އަސާސީ މުސާރައަކީ 10,000 ރުފިޔާއެވެ. އެގްޒެކެޓިވް އެލަވަންސަކީ 7,000 ރުފިޔާއެވެ.

ޕޭ ކޮމިޝަނުގެ މި ނިންމުމާއެކު، އައިސީޓީ ދާއިރާގެ ބައެއް މަގާމުތަކުގެ މުސާރައަށް ވެސް ވަނީ ބަދަލު ގެނެސްފައެވެ. އޭގެ ތެރޭގައި އައިސީޓީ އޮޕަރޭޝަން އެންޑް ޔޫޒާ ސަޕޯޓް ޓެކްނީޝަނުންނާއި، އައިސީޓީ މެނޭޖަރުންގެ އިތުރުން އައިސީޓީ އެނަލިސްޓުންގެ ޖޮބް މެޓްރިކްސްތަކުގައި ހިމެނޭ މުވައްޒަފުންގެ މުސާރައާއި އިނާޔަތްތައް ހިމެނެއެވެ.

ސިވިލް ސާވިސް ކޮމިޝަނުން ހާމަކޮށްފައިވާ ގޮތުގައި، މި އާ އޮނިގަނޑަށް އަމަލުކުރަން ފެށުމަށް ހަމަޖެހިފައިވަނީ ކުރިއަށް އޮތް މަހުގެ އެއްވަނަ ދުވަހުން ފެށިގެންނެވެ.