ހުޅުމާލޭ ފޭސް ދޭއްގައި އިމާރާތްކުރެވެމުންދާ މިސްކިތްތައް ނުނިމި ދިގުލައިގެންދާ މައްސަލައަކީ މިހާރު އެ ސަހަރުގައި އުޅެމުންދާ ގިނަ މީހުންގެ އެންމެބޮޑު ޝަކުވާއެވެ. ހުޅުމާލޭ ފޭސް ދޭއްގައި ދިރިއުޅެމުންދާ މީހުންގެ އާބާދީ އިތުރުވަމުންދާއިރު، ސަރުކާރުން ވަނީ މިސްކިތްތަކެއް އިމާރާތްކުރުމުގެ މަސައްކަތް އެކި ކުންފުނިތަކާ ހަވާލުކޮށްފައެވެ. 

ހުޅުމާލޭ ފޭސް ދޭއްގައި އިމާރާތްކުރަމުންދާ މިސްކިތްތައް މިއަހަރަކުގެ ތެރޭގައި ނިމޭނޭކަމުގެ އިޝާރާތެއް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވަނީ މިދިޔަ ހަފްތާގެ ތެރޭގައި ދެއްވާފައެވެ. ނޫސްވެރިންގެ ވަޓްސްއަޕް ގްރޫޕްގައި މިނިސްޓަރު ޝަހީމް ވިދާޅުވެފައިވަނީ މި ހުޅުމާލޭގައި އިމާރާތް ކުރެވެމުންދާ ދާއިމީ މިސްކިތްތައް މި އަހަރު ނިމުމުގެ ކުރިން ހުޅުވުމަށް މަސައްކަތް ކުރަމުންދާކަމަށެވެ. އެގޮތުން އަމާޒަކީ މިއަހަރުގެ ނިޔަލަށް ހުޅުމާލެގައި ހަދާފައިވާ ވަގުތީ މިސްކިތްތައް އުވާލުންކަމަށް މިނިސްޓަރު ވިދާޅުވިއެވެ.

ހުޅުމާލޭގައި އިމާރާތް ކުރެވެމުންދާ ދާއިމީ މިސްކިތްތަކަށް ބަލާއިރު، ހިޔާ ޝަހަރާއި، ވިނަރެސް ސަރަަހައްދުގެ އިތުރުންވެސް މީހުން އަލަށް އާބާދުވި ޓަވަރުތައް ކައިރިވެސް މިސްކިތްތައް އިމާރާތްކުރުމުގެ މަސައްކަތް ކުރިއަށް އެބަދެއެވެ.

މީގެތެރެއިން އެންމެ އަވަހަށް ހުޅުވާނޭ މިސްކިތެއްގެ ގޮތުގައި އާއްމުން ފާހަގަކުރާ މިސްކިތަކީ ވިނަރެސް ޓަވަރު 8 ކުރިމަތީ ބެޗް ކޮންސްޓްރަކްޝަނުން އިމާރާތްކުރަމުންދާ މިސްކިތެވެ. މި މިސްކިތުގެ ބޮޑުބައެއް މިހާރު ނިމިފައިވާއިރު، މައުލޫމާތު ލިބިފައިވާ ގޮތުގައި މިހާރު ކުރިއަށްދަނީ ފިނިޝިން މަސައްކަތެވެ. މިސްކިތުގެ ގުއްބާއި ބޭރުގައި ލާންޖެހޭ ކުލަ ލައި ނިންމައި ނަންބޯޑުވެސް މިހާރު ވަނީ ހަރުކޮށް ނިންމާފައެވެ.

ބެޗް ކޮންސްޓްރަކްޝަނުން އިމާރާތް ކުރަމުންދާ މިސްކިތް.. ފޮޓޯ: ވޮއިސް

ބެޗް ކޮންސްޓްރަކްޝަނުން އިމާރާތްކުރަމުންދާ މި މިސްކިތަކީ 1095 މީހުންގެ ޖާގައިގެ މިސްކިތެކެވެ. އެންމެކުރިން މި މިސްކިތް ހުޅުވަން ނިންމަން ތާވަލްކޮށްފައި އޮތީ މިއަހަރުގެ މާޗްމަހުއެވެ.

ހުޅުމާލޭގައި އިމާރާތް ކުރަމުންދާ މިސްކިތްތަކަށް ބަލާއިރު، ނުނިމި ދިގުލައިގެންދިޔަ މިސްކިތަކީ ސަލާހުއްދީން ސްކޫލް ކައިރީ އެސްޖޭއިން އިމާރާތްކުރަމުން އަންނަ މިސްކިތެވެ. ހުޅުމާލޭ ފޭސް ދޭއްގައި އެސްޖޭއިން ބިނާކުރަމުންދާ މިސްކިތުގެ މަސައްކަތުގެ އެއްބަސްވުމުގައި ސޮއިކޮށްފައިވަނީ، 2022 ވަނަ އަހަރުގެ ޖެނުއަރީމަހުގެ ތެރޭގައެވެ. އެސްޖޭއިން އެ މިސްކިތް ނިންމާގޮތަށް އޮތީ އަހަރުދުވަހުގެ ތެރޭގައެވެ. ނަމަވެސް މި މިސްކިތް ނުނިމި ދިގުލައިގެންދިޔަތާ މިހާރު މިހިނގަނީ ހަތަރުވަނަ އަހަރެވެ.

އެސްޖޭ މިސްކިތް މިއަހަރަށް ނިމޭނޭކަމަށް އިސްލާމިކް މިނިސްޓްރީން ހިސާބުޖެހިނަމަވެސް، މީގެ ކުރިން 2024 ވަނަ އަހަރުގެ ޑިސެމްބަރަށްވެސް އެ މިސްކިތް ނިމޭނޭކަމަށް ބުންޏެވެ. އެސްޖޭ މިސްކިތް ނިންމަން ބުނިތާ އަހަރެއް ފާއިތުވެގެން ދިޔައިރުވެސް އެ މިސްކިތުގެ މަސައްކަތް މާބޮޑަށް ކުރިއަށްދާތީއެއް ނުފެނެއެވެ. އެގޮތުން މިހާރުވެސް މިސްކިތް ފެންނަން ހުރީ 2024 ވަނަ އަހަރު ޑިސެމްބަރުމަހު މަސައްކަތް ކުރިއަށް ގޮސްފައިހުރި ހިސާބަށްކަމަށް ފެންނަ ފެނުމަށް ފާހަގަކުރެވެއެވެ.

އެސްޖޭ މިސްކިތް 2024 ވަނަ އަހަރުގެ ޑިސެމްބަރުމަހުފަހުކޮޅު މަސައްކަތް ގޮސްފައިހުރި ހިސާބު

އެސްޖޭ މިސްކިތް އޭގެ ފަހުން ބޭރުގައި ސިމެންތި ޖަހައި ބައެއްގައި ސީލަރު ލާފައިވާއިރު، މިއަހަރަށް ނިމޭވަރަށް އެ މިސްކިތުގެ މަސައްކަތް ނިމިފައިނުވާކަމަށް އެ ހިސާބުގައި ދިރިއުޅެމުންދާ މީހުންވެސް ފާހަގަކުރެއެވެ. 

އެސްޖޭ މިސްކިތުގެ މަސައްކަތް މިހާރު ހުރި ހިސާބު... ފޮޓޯ: ވޮއިސް

ކުރިން އެ މިސްކިތުގެ މަސައްކަތް ލަސްވަމުންދާ މައްސަލާގައި އިސްލާމިކް މިނިސްޓްރީން 2023 ވަނަ އަހަރުގެ މާޗްމަހު ބުނެފައިވަނީ، މަސައްކަތް މަޑުޖެހުނީ ފައުންޑޭޝަން އެޅިފަހުން ބެންޗްމާކްތަކުގައި މައްސަލަތަކެއް ދިމާވެގެން ކަމަށެވެ.

އެސްޖޭއިން އިމާރާތްކުރަމުންދާ މިސްކިތުގައި އެއްފަހަރާ 1،400 މީހުންނަށް ނަމާދުކުރެވޭއިރު، މިސްކިތުގެ ބޭރާއެކު އެއްފަހަރާ 3،000 މީހުންނަށް ނަމާދުކުރެވޭނޭކަމަށް އިސްލާމިކް މިނިސްޓްރީން އޭރު ވަނީ ބުނެފައެވެ. މި މިސްކިތަކީ ތަފާތު ގޮތަކަށް އިމާރާތްކުރަމުންދާ މިސްކިތެކެވެ.