ކުޅުދުއްފުށީ ސިޓީގައި ޕޯސްޓުގެ ޚިދުމަތްތައް އައު އިމާރާތަކަށް ބަދަލުކޮށް ޕިކްޕޯސްޓް ޚިދުމަތް 26 ޖުލައި 2026 ގައި ފަށައިފިއެވެ.
މޯލްޑިވްސް ޕޯސްޓުން ބުނީ މި ބަދަލާ އެކު ޕޯސްޓުގެ ހުރިހާ ޚިދުމަތެއް މިހާރު ދެމުން ގެންދާނީ އެ ސިޓީގެ ބަންޑާރަމަގުގައި ހުންނަ ސީނާ ބިލްޑިންގެ ފުރަތަމަ އަދި ދެވަނަ ފަންގިފިލާއިން ކަމަށެވެ. އެ ތަނަކީ ޝަހީދު ކޯޕްރަލް ޙުސައިން އާދަމް ހަނދާނީ ބިނާ ކައިރީގައި ހުންނަ އިމާރާތެއް ކަމަށް ވެސް ޕޯސްޓް އޮފީހުން ބުނެފައިވެއެވެ.
ޕިކްޕޯސްޓް ޚިދުމަތުގެ ދަށުން ޕާރުސަލް ނެގުމަށް ކިއުގައި މަޑުކުރާކަށް ނުޖެހޭނެއެވެ. ޕޯސްޓް އޮފީހުން ބުނީ ޕާރުސަލް ލިބޭކަން އެންގުމަށް ފޮނުވާ މެސެޖުގައި ހިމެނޭ ވަގުތުގެ ތެރޭގައި ޚިދުމަތް ހޯދާ ފަރާތަށް ފަސޭހަ ކޮންމެ ވަގުތެއްގައި ވެސް އައިސް ޕާރުސަލް ބަލައިގަނެވޭނެ ކަމަށެވެ.
މީގެ އިތުރުން ރާއްޖޭގެ އެހެން ރަށްތަކަށާއި ސިޓީތަކަށް ޕާރުސަލް ފޮނުވުމުގެ ޚިދުމަތާއި ރާއްޖެއިން ބޭރަށް ޕޯސްޓް ކުރުމުގެ ޚިދުމަތް ކުރިއެކޭ އެއްގޮތަށް އެ އޮފީހުން ލިބޭނެ ކަމަށް ޕޯސްޓުން ބުނެފައިވެއެވެ.
ހަމައެއާ އެކު ދިވެހި އުފެއްދުންތެރިންގެ ތަކެތި ވިއްކުމަށް ޚާއްޞަ "ރަށު އޮންލައިން ފިހާރަ" ނުވަތަ "ކޮމިއުނިޓީ އޮންލައިން ޝޮޕް" މެދުވެރިކޮށް ރާއްޖެ އާއި ރާއްޖެއިން ބޭރުގެ ކަސްޓަމަރުންނަށް ޕޯސްޓް މެދުވެރިކޮށް ތަކެތި ރައްދުކޮށްދިނުމުގެ ޚިދުމަތާއި އީޓުކުރި ލޯކަލް ޕްލެޓްފޯމް މެދުވެރިކޮށް ވިޔަފާރިކުރުމުގެ ޚިދުމަތް ވެސް ފޯރުކޮށްދޭނެ ކަމަށް އެ ކުންފުނިން ބުނެފައިވެއެވެ.
ޕޯސްޓުގެ ޚިދުމަތްތައް ޒަމާނީކޮށް ރައްޔިތުންނާ ގާތުން ޚިދުމަތް ދިނުމަށް ކުރެވޭ މަސައްކަތްތައް މި ބަދަލާ އެކު އިތުރު ހަރުފަތަކަށް ގެންދެވޭނެ ކަމަށް މޯލްޑިވްސް ޕޯސްޓުން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
