ފަޅުރަށަކުން ޤަވާއިދާ ޚިލާފަށް ވެލި ނަގަމުންދިޔަ ބަޔަކު ހުއްޓުވައި، އެ އެމީހުން ނަގާފައިވާ ވެލިތައް އަނބުރާ ހުސްކުރުވައިފިއެވެ.

ފަރެސްމާތޮޑާ ކައުންސިލުން އިއްޔެ ބުނިގޮތުގައި، އެ ސަރަޙައްދުގެ ފަޅުރަށްތަކުން ވެލި ނެގުމަކީ ޤާނޫނީ ގޮތުން މަނާކަމެކެވެ. އަދި ރަށްތައް ހިމާޔަތްކުރުމުގައި ހުރިހާ ފަރާތްތަކުން އެއްބާރުލުން ދިނުމަކީ ކައުންސިލްގެ ވަރަށް ބޮޑު އެދުމެއް ކަމަށެވެ.

ކައުންސިލުން ބުނީ މި ސަރަޙައްދުގެ އެއްރަށް މުޅިން ގިރައިގެންގޮސް ނެތިވެދިޔައީ ހުއްޓުމެއްނެތި ވެލި ނެގުމުގެ ސަބަބުން ކަމަށެވެ. އަދި މިހާރު ޖެހިގެން އޮތް ރަށުންވެސް އެފަދަ އަމަލުތައް ފެންނަމުންދާތީ، ކައުންސިލުން މިހާރު ވަނީ ކަމާބެހޭ އިދާރާތަކާ ގުޅިގެން މި ރަށްތައް މޮނިޓަރ ކުރަން ފަށާފައެވެ.

"އަޅުގަނޑުމެންގެ ރަށްތައް ހިމާޔަތްކުރުމުގައި އެންމެހާ ފަރާތްތަކުން އެއްބާރުލުން ދެއްވުމަކީ މި ކައުންސިލްގެ ވަރަށް ބޮޑު އެދުމެއް. މި އުސޫލާ ޚިލާފުވާ ފަރާތްތަކާމެދު ފަސްޖެހުމެއް ނެތި ޤާނޫނީ ފިޔަވަޅު އަޅާނެކަމުގައި ދަންނަވަން،" ފަރެސްމާތޮޑާ ކައުންސިލުން ނެރުނު ބަޔާނުގައި ވެއެވެ.

ތިމާވެށި ހިމާޔަތްކުރުމުގެ ގޮތުން ފަޅުރަށްރަށުންނާއި ގިރާ ސަރަޙައްދުތަކުން ވެލި ނެގުމަކީ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން މަނާކަމެކެވެ.

ކައުންސިލުން އިތުރަށް ބުނީ، ކުރިއަށް އޮތް ތަނުގައިވެސް މިފަދަ އަމަލުތައް ހިންގާ ފަރާތްތައް ދެނެގަނެ، އެފަރާތްތަކާ މެދު ހަރުކަށި ފިޔަވަޅު އަޅަމުންދާނެ ކަމަށެވެ.