މޮރޯކޯގެ އެތައްހާސް ރެފިއުޖީންނެއް ސްޕެއިންގެ ސެއުޓާގެ ބޯޑަރު ފޫއަޅުވާލުމަށްފަހު އެ ސިޓީއަށް ވަދެގަނެއްޖެއެވެ.

ސެއުޓާ އަށް ބުރާސްފަތި ދުވަހު އެތައް ހާސް ހިޖުރަވެރިންނެއް ވަދެގަތުމާ ގުޅިގެން، ސަލާމަތީ އަދި އިންސާނީ އެހީތެރިކަމުގެ ބޮޑު އޮޕަރޭޝަނެއް ފަށާފައިވާއިރު، ކަމާބެހޭ ފަރާތްތަކުން ބުނީ ހިޖުރަވެރިންގެ އަދަދު 50،000 ހާހަށް އަރާނޭކަމަށް ބެލެވޭކަމަށެވެ. 

ސެއުޓާ ސަރަހައްދުގެ ކަމާބެހޭ ފަރާތްތަކުން އިންޒާރު ދޭ ގޮތުގައި ހިޖުރަވެރިން ބަލައިގަންނަ ނިޒާމަށް މިހާރު ވަނީ އޮބިނޯންނަ ވަރަށް ބާރުބޮޑުވެފައެވެ. އެހެންކަމުން، މެޑްރިޑްގައި އޮންނަ މަރުކަޒީ ސަރުކާރުގެ ކުއްލި އެހީތެރިކަމަށް އެ ފަރާތްތަކުން ވަނީ އެދިފައެވެ. ބޮޑެތި ގްރޫޕްތަކުން ކަނޑުމަގުން މި ސަރަހައްދަށް ވަދެފައިވާއިރު، ގިނަ ބަޔަކު ވަނީ "ތަރަޖަލް" ބްރޭކްވޯޓާ ކައިރިން ފަތާފައި އަދި ވައިޖެހި ރިންގާއި އެހެނިހެން ވަސީލަތްތައް ބޭނުންކޮށްގެން އެތެރެއަށް ވަދެފައެވެ. އަދި ބައެއް މީހުން ބޯޑަރު ފެންސުގެ ދޮރެއް ހަލާކުކޮށްލުމަށްފަހު ސިޓީގެ ތެރެއަށް ދުވެފައި ވަދެފައިވެއެވެ. ޓީވީ ފުޓޭޖްތަކުން ފެންނަ ގޮތުގައި، ގިނަ އަދަދެއްގެ ބަޔަކު ބޯޑަރު ހުރަސްކުރަމުން ދިޔައިރު ބައެއް މީހުން "ވިވާ އެސްޕަންޔާ! އޭ ގޮވަމުން ގޮސްފައި ވެއެވެ.

މި ހާދިސާ ހިނގާފައިވަނީ ފާއިތުވި ދުވަސްތަކުގައި ހިޖުރަވެރިން އަންނަ މިންވަރު އިތުރުވެފައި ވަނިކޮށެވެ. ސެއުޓާގެ ސަރަހައްދީ ރައީސް ހުއާން ހީސޫސް ވިވާސް ހާމަކުރެއްވި ގޮތުގައި، ފާއިތުވި ހަފުތާގެ ތެރޭގައި އެކަނިވެސް 1,500 އަށްވުރެ ގިނަ މީހުން ވަނީ ކަނޑުމަގުން އެ ސަރަހައްދަށް ވަދެފައެވެ.

ހިޖުރަވެރިން ބައިތިއްބާ މަރުކަޒުތައް މިހާރު ވަނީ ފުރިފައެވެ. މީގެ ސަބަބުން އެތައް ސަތޭކަ ބަޔަކު މަގުމަތީގައި ނިދަން މަޖުބޫރުވެފައިވާއިރު، އިތުރަށް އަންނަ މީހުން ބަލައިގަތުމުގެ ގާބިލުކަން އެ ސިޓީގައި މިހާރު ނެތް ކަމަށް އޭނާ ވިދާޅުވިއެވެ.

"މަރުކަޒުތައް ވަނީ މުޅިން ފުރިފައި. އެއްވެސް މީހަކަށް އިތުރު ޖާގައެއް ނެތް. އިއްޔެގެ ހިސާބުތަކަށް ބަލާއިރު ދުވާލަކު 200 އަށްވުރެ ގިނަ މީހުން އެބަ އެތެރެވޭ،" އޭނާ ވިދާޅުވިއެވެ.

މި ހާދިސާގެ ސަބަބުން 2021 ވަނަ އަހަރުގެ މެއި މަހު ކުރިމަތިވި ބޮޑު ބޯޑަރު ކްރައިސިސްގެ ހަނދާންތައް ވަނީ އާވެފައެވެ. އެފަހަރު ބޯޑަރު ކޮންޓްރޯލް ކުޑަވަގުތުކޮޅަކަށް ދޫވެގެން ދިޔުމުގެ ސަބަބުން، ދެ ދުވަސް ތެރޭގައި 8,000 އަށްވުރެ ގިނަ މީހުން މޮރޮކޯ އިން ސެއުޓާ އަށް ވަދެފައިވެއެވެ.