އަންހެނެއްގެ ޖަންގިޔާ ތެރޭގައި ފޮރުވާފައި ހުރި މަސްތުވާތަކެއްޗަކީ އޭނާގެ އެއްޗެއް ކަމަށް ބުނެ، އެކަމާ ފިރިމީހާ ހަވާލުވުމާ ގުޅިގެން އެ އަންހެންމީހާގެ މައްޗަށް ކުރި ދައުވާ އަނބުރާ ގެންދަން ޕްރޮސިކިއުޓަރ ޖެނެރަލްގެ އޮފީހުން ނިންމި ސަބަބު އެ އޮފީހުން ހާމަކޮށްދީފިއެވެ.

މި ހާދިސާއަކީ 2024 ވަނަ އަހަރުގެ ނޮވެމްބަރު މަހުގެ 18 ވަނަ ދުވަހު ލ. އަތޮޅުގައި ފުލުހުން ހިންގި އޮޕަރޭޝަނެއްގައި ހިނގި ކަމެކެވެ. އެ އޮޕަރޭޝަނުގައި ހައްޔަރުކުރި ހއ. ހޯރަފުށްޓަށް ނިސްބަތްވާ އަންހެންމީހާ ބަލައި ފާސްކުރިއިރު، އޭނާ ލައިގެން ހުރި ޖަންގިޔަލުގައި ހަރުކޮށްފައި އޮތް ޕެޑެއްގެ މަތީގައި ޓޭޕް އަޅައި ފޮރުވާފައި ހުރި 9.2 ގްރާމްގެ ޑައިމޯފިން ފެނިފައިވެއެވެ.

މި މައްސަލާގައި ދައުލަތުން ދައުވާ އުފުލީ އެ އަންހެންމީހާއާއި އޭނާގެ ފިރިމީހާ (ލ. މާވަށު މީހެއް) ގެ މައްޗަށެވެ. ދެމީހުންގެ މައްޗަށްވެސް އުފުލީ ޑައިމޯފިން ޓްރެފިކް ކުރުމުގެ ދައުވާއެވެ. މީގެ އިތުރުން ފިރިހެންމީހާގެ މައްޗަށް ކެނެބިސް ބޭނުންކުރުމުގެ ދައުވާވެސް އުފުލިއެވެ.

މި މައްސަލައިގެ ޝަރީއަތް ލ. ފޮނަދޫ މެޖިސްޓްރޭޓް ކޯޓުގައި ކުރިއަށް ދިޔައިރު، ފިރިމީހާ ވަނީ އެ ތަކެއްޗަކީ އޭނާގެ އެއްޗެއް ކަމަށް އިއުތިރާފުވެފައެވެ. އޭނާ ބުނި ގޮތުގައި ފުލުހުން އެމީހުން ހުއްޓުވި ވަގުތު ކުއްލިއަކަށް އޭނާ އެ ތަކެތި އަނބިމީހާ އަތަށް ދިނީ ފޮރުވުމަށެވެ. އަދި އެއީ މަސްތުވާތަކެތިކަން އަނބިމީހާއަށް ނޭނގޭނެ ކަމަށްވެސް އޭނާ ބުންޏެވެ. އަނބިމީހާވެސް ބުނެފައިވަނީ ފިރިމީހާ ކުއްލިއަކަށް ދިން އެތި ފޮރުވައިދިނީ ކަމަށާއި، އޭގައި ހުރީ ކޯއްޗެއްކަން އޭނާއަށް ނޭނގޭ ކަމަށެވެ.

ޕީޖީ އޮފީހުން ބުނި ގޮތުގައި، އަނބިމީހާގެ މައްޗަށް ކުރި ދައުވާ އަނބުރާ ގެންދަން ނިންމީ ފިރިމީހާ ޝަރީއަތުގައި ކުށަށް އިއުތިރާފުވެ، އޭނާގެ މައްޗަށް ހުކުމްކޮށް ނިމުމުންނެވެ. ފިރިހެންމީހާއަކީ ކުށުގެ ދިގު ރެކޯޑެއް އޮތް މީހެއް ނަމަވެސް، އަންހެންމީހާގެ އެފަދަ ރެކޯޑެއް ނެތެވެ.

ޕީޖީ އޮފީހުން އިތުރަށް ބުނީ، އާންމު އުސޫލެއްގެ ގޮތުން އެހެން މީހަކު ކުށުގެ ޒިންމާ ނެގުމަކީ އަނެކާ ކުށުން ބަރީޢަވާނެ ކަމެއް ނޫން ނަމަވެސް، ހާދިސާ ހިނގާފައިވާ ގޮތަށް ބަލާއިރު މި މައްސަލައިގައި ހާލަތު ތަފާތު ކަމަށެވެ. ދައުލަތުން އެދުމުން ކޯޓުން މިހާރު ވަނީ އަންހެންމީހާގެ މައްސަލަ އަނބުރާ ފޮނުވާލާފައެވެ.