ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން އއ.އުކުޅަހުގައި އަޅަން ނިންމި ހައުސިން ޔުނިޓްތަކުގެ އަމަލީ މަސައްކަތް ފަށައިފިއެވެ.
އުކުޅަހުގެ ހައުސިން ޔުނިތްތަކުގެ މަސައްކަތް ފަށާފައިވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެރަށަށް ކުރެއްވި ޒިޔާރަތުގެ ތެރެއިންނެވެ. ހައުސިން ޔުނިޓްތަކުގެ އަމަލީ މަސައްކަތް ރަސްމީކޮސް ފައްޓަވައިދެއްވީ ހައުސިން މިނިސްޓަރު ޑރ.އަބްދުﷲ މުއްތަލިބެވެ. އެމަނިކްފާނުގެ އަރިހުގައި އުކުޅަހު ކައުންސިލްގެ ރައީސް އަދި އަލްޓެކް ކުންފުނީގެ އިސްވެރިން ބައިވެރިވެ ވަޑައިގަތެވެ.
އުކުޅަހު ހައުސިން ޔުނިޓްތަކުގެ އަމަލީ މަސައްކަތް ފެށުން.. ފޮޓޯ: ރައީސް އޮފީސް
ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން އުކުޅަހުގައި 50 ހައުސިން ޔުނިޓް ތަރައްޤީކުރުމަށް ވަނީ ނިންމާފައެވެ. މި މަސައްކަތް ހަވާލުކޮށްފައިވަނީ އަލްޓެކާއެވެ. އުކުޅަހުގައި ހައުސިން ޔުނިޓްތައް އަޅަނީ އެރަށު ހިއްކި ބިމުގައެވެ.
ސަރުކާރުން ވަނީ މިފަހުން 13 އަތޮޅެއްގައި ހައުސިން ޔުނިތްތައް ތަރައްޤީކުރުމުގެ މަސައްކަތް ކޮށްދޭނެ ކުންފުނިތައް ހޯދުމަށް އިއުލާނުކޮސްފައެވެ. އެއީ 2100 ހައުސިން ޔުނިޓެވެ. މި ޔުނިޓްތައް މި ދައުރު ނިމުމުގެ ކުރިން ނިންމުމަކީ އެންމެބޮޑު އަމާޒުކަމަށް ސަރުކާރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
