ނ އަތޮޅު ކެނދިކުޅުދޫގައި ތަރައްޤީކުރި ކުޑަކުދިންގެ ޕާކް މިއަުދ ހުޅުވައިފިއެވެ.

ކުޑަކުދިންގެ ޕާކެއް ނެތް ރަށްރަށުގައި ޕާކު ޤާއިމުކުރެއްވުމަކީ ރައީސް ޑރ. މުޙައްމަދު މުޢިއްޒުގެ ވައުދުފުޅެކެވެ.

ކެނދިކުޅުދޫގައި ތަރައްޤީކުރި ޕާކު ހުޅުވައިދެއްވީ އެކަމަށްޓަކައި މިއަދު ބޭއްވި ހަފްލާގައި ޢުމްރާނީ ތަރައްޤީއާ ބެހޭ ވުޒާރާގެ ސްޓޭޓް މިނިސްޓަރު އަޙްމަދު ސާލިމާއި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ގެ މެނޭޖިން ޑިރެކްޓަރު އިބްރާހީމް ނަޡީމެވެ.

ހައުސިން މިނިސްޓްރީން ބުނީ ޕާކްތައް ތަރައްޤީކުރުމުގެ މަޝްރޫޢުގެ ދަށުން ޖުމްލަ 46 ރަށެއްގައި ޕާކު ތަރައްޤީކުރުމުގެ މަސައްކަތް ސަރުކާރު ހިއްސާވާ ފަސް ކުންފުންޏަކާ ހަވާލުކޮށްފައިވާކަމަށެވެ. އެ ކުންފުނިތަކުގެ ތެރޭގައި ފެނަކަ ކޯޕަރޭޝަނާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި އާރުޑީސީ އާއި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ހިމެނެއެވެ.

މުޅި މަޝްރޫޢު ދެ ބުރަކަށް ބަހާލައިގެން ކުރިއަށް ގެންދާ އިރު ފުރަތަމަ ބުރުގައި 14 ރަށެއް އަދި ދެވަނަ ބުރުގައި 32 ރަށެއް ހިމެނެއެވެ.