ރާއްޖޭގައި މަދިރީގެ ޒަރީޢާއިން ފެތުރޭ ބަލިތައް، ޚާއްޞަކޮށް ޑެންގީ ހުން ޖެހިގެން ރިޕޯޓްކުރާ މީހުންގެ އަދަދު މިދިޔަ އަހަރުގެ މި މުއްދަތާ އަޅާބަލާއިރު ބޮޑުތަނުން އިތުރުވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ ތަފާސް ހިސާބުތަކުން ދައްކައިފިއެވެ.

އެޗްޕީއޭގެ ތަފާސް ހިސާބުތަކަށް ބަލާއިރު، 2025 ވަނަ އަހަރުގެ ޖޫން މަހު 168 މީހަކަށް ޑެންގީ ޖެހިގެން ރިޕޯޓްކޮށްފައިވާއިރު، 2026 ވަނަ އަހަރުގެ ޖޫން މަހު މި އަދަދު ވަނީ 673 އަށް އުފުލިފައެވެ. އަދި 2025 ވަނަ އަހަރުގެ ޖުލައި މަހު 194 މީހަކަށް ބަލި ޖެހުނުއިރު، 2026 ވަނަ އަހަރުގެ ޖުލައި މަހު 443 މީހަކަށް ވަނީ ބަލި ޖެހިފައެވެ.

މި އަހަރުގެ ޖޫން މަހާ އަޅާބަލާއިރު ޖުލައި މަހު ބަލި ޖެހުނު މީހުންގެ އަދަދު ކުޑަކޮށް މަދުވި ނަމަވެސް، މިއީ އަދިވެސް ނިސްބަތުން މަތީ އަދަދެއްކަމުން، ބަލިން ރައްކާތެރިވުމުގެ ފިޔަވަޅުތައް އެޅުމަކީ ނުހަނު މުހިއްމު ކަމެއްގެ ގޮތުގައި އެޗްޕީއޭ އިން ފާހަގަކުރެއެވެ.

ޑެންގީ އިން ރައްކާތެރިވުމަށްޓަކައި އަންނަނިވި ކަންކަމަށް ސަމާލުކަން ދިނުމަށް ސިއްހީ މާހިރުން އިރުޝާދު ދެއެވެ:

މަދިރިން ރައްކާތެރިވުން: ހަށިގަނޑު ރަނގަޅަށް ނިވައިވާ ގޮތަށް ހެދުން އެޅުމާއި، މަދިރި ލޯޝަން ނުވަތަ ސްޕްރޭ ބޭނުންކުރުން. ޚާއްޞަކޮށް DEET, Picaridin, IR3535, OLE, PMD ނުވަތަ 2-undecanone ހިމެނޭ ރެޕެލެންޓް ބޭނުންކުރުން.

ގެދޮރު ރައްކާތެރިކުރުން: މަދިރި އެންމެ ގިނަވާ ވަގުތުތައް ކަމަށްވާ ފަތިސް ގަޑީގަޔާއި އިރުއޮއްސޭ ވަގުތު ގޭގެ ދޮރުތަކާއި ކުޑަދޮރުތައް ލައްޕާފައި ބެހެއްޓުން.

މަދިރި އާލާވާ ތަންތަން ނައްތާލުން: ފެން ހަރުލާ ފަދަ ހުސް ފުޅި އާއި ދަޅު ފަދަ ތަކެތި ގޯތިތެރެއަށާއި މަގުމައްޗަށް އުކާނުލުމާއި، ފެން ހަރުލާ ގޮތަށް ހުންނަ ތަންތަން އަބަދުވެސް ސާފުކޮށް ބެލެހެއްޓުން.

ހުން ޖެހިއްޖެނަމަ ގޭގައި ތިބެގެން ކުރެވިދާނެ ބައެއް ކަންކަމުގެ ތެރޭގައި ގިނައިން އަރާމުކުރުމާއި، ކުރުނބާފެން، ލޮނުޕެކެޓް އަދި ސޫޕް ފަދަ ފައިދާހުރި ދިޔާތަކެތި ގިނައިން ބޭނުންކުރުން ހިމެނެއެވެ. ހުން މަޑުކުރުމަށާއި ގައިގައި ރިއްސުމަށް ޕެރެސެޓަމޯލް ބޭނުން ކުރެވިދާނެއެވެ.

ނަމަވެސް، ތިން ދުވަހަށްވުރެ އިތުރަށް ހުން އަންނަނަމަ، ނުވަތަ ދިޔާއެއްޗެހި ބޭނުން ނުކުރެވޭ ވަރަށް ބޮޑަށް ވަރުދެރަވާނަމަ، ލަސްނުކޮށް ޑޮކްޓަރެއްގެ ލަފާ ހޯދުމަށް އެޗްޕީއޭ އިން ވަނީ އިލްތިމާސްކޮށްފައެވެ.