ޤައުމީ ފެންކުންފުނި އެމްޑަބްލިއުއެސްސީއަށް ނިމިގެންދިޔަ 2025 ވަނަ އަހަރު ސާފްފައިދާގެ ގޮތުގައި 145.7 މިލިއަން ރުފިޔާ ލިބިއްޖެއެވެ.

ދައުލަތުގެ އޮޑިޓަރ ޖެނެރަލްގެ އޮފީހުން މިއަދު ނެރެފައިވާ ފެންކުންފުނީގެ މިދިޔަ އަހަރުގެ މާލީ ބަޔާނުގައި ވާގޮތުން އެ އަހަރު އެކުންފުންޏަށް ވަނީ 1.3 ބިލިއަން ރުފިޔާގެ އާމްދަނީއެއް ލިބިފައެވެ. މި މުއްދަތުގެ ތެރޭގައި ކުންފުނީގެ ހިދުމަތްތައް ދިނުމަށް 820.9 މިލިއަން ރުފިޔާ ވަނީ ހޭދަވެފައެވެ. މި މުއްދަތުގެ ތެރޭގައި ޖުމްލަ ފައިދާގެ ގޮތުގައި 553.1 މިލިއަން ރުފިޔާ ލިބުނުއިރު، އިދާރީ ހަރަދުތަކުގެ ގޮތުގައި 365.1 މިލިއަން ރުފިޔާ ހަރަދުވިއެވެ.

މިދިޔަ އަހަރު ޓެކްސްއަށް ކެނޑުމުގެ ކުރިން ފެންކުންފުނީގެ ފައިދާއަކީ 172.4 މިލިއަން ރުފިޔާއެވެ. އަދި ޓެކްސްއަށް ކެނޑުމަށްފަހު ކުންފުނީގެ ސާފް ފައިދާއަކީ 145.7 މިލިއަން ރުފިޔާއެވެ. މިދިޔަ އަހަރު އެމްޑަބްލިއުއެސްސީ ގްރޫޕް ކުންފުންޏަށް ސާފްފައިދާގެ ގޮތުގައި ލިބިފައިވަނީ، 187.5 މިލިއަން ރުފިޔާއެވެ.

އެމްޑަބްލިއުއެސްސީއަށް 2024 ވަނަ އަހަރު އާމްދަނީގެ ގޮތުގައި ވަނީ 1.6 ބިލިއަން ރުފިޔާ ލިބުނުއިރު ސާފްފައިދާގެ ގޮތުގައި ލިބިފައިވަނީ 226 މިލިއަން ރުފިޔާއެވެ.