ގދ. ތިނަދޫ ސިޓީގެ އެއާޕޯޓް މަޝްރޫއުއަކީ ވެވަޑައިގެންފައިވާ އެންމެ މުހިންމު އެއް ވައުދު ކަމަށާ އެ މަޝްރޫއުގެ އަމަލީ މަސައްކަތް ވަރަށް އަވަހަށް ފެށޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
ސިލްސިލާ ޕޮޑްކާސްޓް "ދަ ޕަލްސް"ގެ 6 ވަނަ އެޕިސޯޑްގައި ވާހަކަފުޅުދައްކަވަމުން ރައީސް ވިދާޅުވީ އެމަނިކުފާނު ވެވަޑައިގެންފައިވާ ވައުދުފުޅުތައް ފުއްދެވުމަށް މަސައްކަތް ފައްޓަވާފައިވާ ކަމަށާ ހަތަރު ސިޓީގައި ވެސް މުހިންމު ގިނަ މަޝްރޫއުތަކެއް ހިންގެވުމަށް ނިންމަވާފައިވާ ކަމަށެވެ.
އަދި މިހާރުވެސް ބައެއް މަޝްރޫއުތައް ފެށިފައިވާ ކަމަށާ ދެން ހުރި މަޝްރޫއުތައް ވަރަށް އަވަހަށް ފެށިގެންދާނެ ކަމަށެވެ. އެގޮތުން އެއް މަޝްރޫއުއަކަށް ފާހަގަ ކުރެއްވީ ތިނަދޫ ސިޓީގެ އެއާޕޯޓް މަޝްރޫއު އެވެ. ވިދާޅުވީ އެއީ ވަރަށް މުހިންމު މަޝްރޫއުއެއް ކަމަށާ އެ މަޝްރޫއު ވަރަށް އަވަހަށް ފެށިގެންދާނެ ކަމަށެވެ.
"ތިނަދޫގައި އެއާޕޯޓުގެ މަޝްރޫއަކީ އަޅުގަނޑުގެ އެންމެ މުހިއްމު ވައުދު އިރާދަކުރެއްވިއްޔާ އެ މަޝްރޫއުވެސް ވަރަށް އަވަހަށް ފެށިގެންދާނެ," ރައީސް ވިދާޅުވި އެވެ.
މީގެ އިތުރުން ކުޅުދުއްފުށި ހައުސިން މަޝްރޫއުވެސް ވަރަށް އަވަހަށް ފެށިގެންދާނެ ކަމަށް ވިދާޅުވި އެވެ.
ރަައީސް ވިދާޅުވީ ކުރިއަށް އޮތް 2027 ވަނަ އަހަރަކީ ތަރައްޤީގެ އެންމެ ގިނަ މަޝްރޫޢުތައް ނިންމާލެވޭނެ އަހަރަށް ވާނެ ކަމަށެވެ.
Advertisement
This content is created and paid for by advertisers and does not involve Voice Journalists
