ދިވެހިރާއްޖޭގައި އިސްލާމްދީނާ ފުށުއަރާނޭގޮތަށް އެއްވެސް ޤާނޫނެއް އުފަން ނުކުރެވޭނޭހެން ކަންކަން ކަށަވަރުކުރައްވާނޭކަމަށް ރައީސުލްޖުްމހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ޤައުމީ ދުވަސް ފާހަގަކުރުމަށް ހއ.އިތީމްގައި ބޭއްވި ޖަލްސާގައި ވާހަކަަދއްކަވަމުން ރައީސް ޑރ.މުއިއްޒު ވިދާޅުވީ، އިސްލާމްދީނާ ބީރައްޓެހި، ނުވަތަ އިސްލާމްދީނާ ދުރު ސިޔާސަތުތައް ތަންފީޛުކުރާ ކޮންމެ ފަހަރަކު ދިވެހި ޤައުމުގެ މިނިވަންކަން އޮތީ ގެއްލިފައި ކަމަށެވެ. ނުވަތަ ދިވެހިރާއްޖޭގެ މިނިވަންކަން ވަނީ ނުރައްކަލުގެ ތުންފަތްމައްޗަށް ވެއްޓިފައި ކަމަށެވެ.

މިސަބަބަށްޓަކައި އިސްލާމްދީން ޙިމާޔަތްކުރެވޭނެ ނިޡާމެއް ޤައުމުގައި ފުރިހަމައަށް ޤާއިމުވެފައި އޮންނަންޖެހޭނެކަމަށް ޤަބޫލުކުރައްވާކަމަށް ރައީސް ވިދާޅުވިއެވެ. ރައީސް ވިދާޅުވީ އިސްލާމް ދީނާ ޚިލާފު އެއްވެސް ޤާނޫނެއް އުފަން ނުކުރެވޭނެ ފަދަ ހަރުދަނާ ބަދަހި ނިޒާމެއް އުސޫލީ ގޮތުންނާ ނިޒާމީ ގޮތުން ކަށަވަރު ކުރަން ބޭނުންވާކަމަށެވެ. އެހެންކަމުން އެފަދަ ނިޒާމެއް ޤާއިމުކުރުމަށް ރައްޔިތުން މަޖިލިހުގެ މިއަހަރުގެ ތިންވަނަ ދައުރަށް ހުށަހަޅާނޭކަމަށް ރައީސް ވިދާޅިވިއެވެ.

ޤައުމީ ދުވަހުގެ މުނާސަބާ ފާހަގަކުރަމުންދާ މި ދުވަހާ ގުޅުވައިގެން ރައީސް ވިދާޅުވީ އިސްލާމް ދީން އެއީ ދިވެހި ޤައުމުގެ ނާރެސް ކަމަށާއި، ކީރިތި ޤުރުއާނަކީ ދިވެހި ޤައުމިއްޔަތުގެ މައިގަނޑު ކަމަށެވެ.

ހިތްދަތި ކަމުގައި އެތައް އަހަރަކު ދިވެހިރާއްޖެ ޕޯޗުގީޒުންގެ އަތްދަށުގައި އޮންނާންޖެހުނީ އަޅުގަނޑުމެން ކުރެ އެންމެ މީހަކު މާތްވެގެންވާ އިސްލާމް ދީން ދޫކޮށްލުމުގެ ސަބަބުންކަން ފާހަގަކުރައްވަމުން ރައީސް ވިދާޅުވީ، ދީން ދޫކޮށްލި ހިސާބުން އެ ޚިޔާނާތްތެރި ވެވުނީ ހަމައެކަނި ދީނަކަށްނޫން ކަމަށެވެ. އެގޮތުން އެ ޚިޔާނާތްތެރި ވެވުނީ ދިވެހި ޤައުމަށް ކަމަށް ރައީސް ވިދާޅުވިއެވެ.